Экс Ерөнхийлөгч Н.Багабандийн улс төрийн амьдралд шинэ хуудас нээгдэв. Тэрбээр хувь улстөрчийнхөө замналыг “Титэм үг” тэрлэхэд биш, титэм үзэл санаагаа хэрэгжүүлэхэд зориулахаар шийджээ. “Амьдрал чамаар дуттал амьдар”. Түүний улс төрийн философи товчхондоо ийм. Үнэхээр ч тэр улс төр өөрөөр нь дуттал тэвчиж, бас хүлээзнэсэн. Гэвч цаг боллоо. Монгол Улсын хоёр дахь Ерөнхийлөгч Н.Багабанди сэнтийгээсээ бууснаас хойш чилийсэн таван жил өнгөрчээ. Яг л “Таван жилийн төлөвлөгөө” гэдэг шиг. Чин үнэндээ улс төрийн ээдрээт амьдралаас хэсэгхэн хөндийрөхийг хувь улстөрчийн философи нь түүнд тулгасан юм. “Тэнэг хүн хэн нэгэнд харагдах гэж урд нь бултганана. Ухаантай хүн харах гэж ард нь үлдэнэ”. “Титэм үг”-дээ тэрлэсэн энэ л үзэл санаагаар Н.Багабанди Төрийн ордноор үзэгдэлгүй удсан хэрэг. “Тэнхлүүн яваа чамд харагдах гэж чанх өмнө чинь бултганах тээртэй хүмүүсийг бүү анхаар. Харах гэж ард нь үлдсэн ухаантай хүнтэй л нөхөрлө” гэж үздэг учраас тэр. Гэвч амбицад хүлэгдсэн тэнэгүүд, алсаа бодогч ухаантнуудын аль нь чухам түүнтэй олон таарсныг экс Ерөнхийлөгч өөрөө л мэдэх биз.  
Н.Багабанди “Алсыг харагч”-аас байгаа хэдийнэ онилжээ. Тий­мээс Төрийн ордонд эргэн мо­рилж, төрийн томчуудын тоглоо­мын дүр­мийг зохиолцох болов. Стра­тегийн орд газруудад эзэн суух гэсэн улс­төрчдийн “Суудал булаалдах” тэмцэлдээний талбарт нэг л суудал халдашгүй дархлаастай. Мэдээж, тэр бол Н.Багабандийн эзэгнэх орон зай. Өндрөөс өндөр “Алсыг харагч”-аас буух ийм хүчтэй аж. Н.Багабанди ба Оюутолгой. Олон хүний эрх ашгийн “нүд” хэрсэн өмнийн говь дахь томоохон орд газрыг экс Ерөн­хийлөгч хөзрийн тамга адил гартаа атгав. Яагаад болохгүй гэж. Тэрбээр Ерөнхийлөгчийн тангараг өргөхдөө өмсч байсан түмэн наст хээтэй шар торгон дээлээ Үндэсний түүхийн музейд хүлээлгэн өгснөөс биш өөрөө дурьдатгалаа ч бичээгүй кандидат. Дурьдатгалаа бичээгүй байна гэдэг Н.Багабандийн хувьд улстөрчийн амьдралдаа цэг тавиагүй гэсэн үг.

Гэвч Н.Багабанди болон түүний экипажийнхнаар сонин юутай бол. “Дайны талбар дахь хамгийн сайн танк бол хамгийн сайн экипажтай танк” гэдэг үгийг экс Ерөнхийлөгч эрхэмлэн санаж явдаг. МАХН-ын XXV их хурлын үеэр С.Баярыг намын дарга болоход чухал нөлөө үзүүлсэн тэрбээр 90 жилийн түүхтэй намынхаа хувь заяаг С.Батболд тэргүүтэй 1960-аад оныхонд даат­гахад бас л нөлөөлсөн эрхэм. Н.Ба­габанди бол зөнч улстөрч. Тэр­бээр 2004 оны өвөл УИХ-ын чуул­ганы нэгдсэн хуралдаанаар 2005 оны улсын төсвийг хэлэлцэх үед ийм утгатай үг хэлсэн байдаг. “Сонгуулийн амлалтыг эрх баригчид л мартахаас ард түмэн хэзээ ч мартдаггүй. Ард түмнийг заримдаа хуурч дөнгөдөг ч худалдан авч болдоггүй. Амлалтуудаа хэрэг­жүү­­лэх төсөв, үндсэн чиглэл бат­лахгүй бол сонгогчид нүүрийг чинь улалзуулж, нүдийг чинь бүл­тэлзүүлэн нэхэмжлэх нь гарцаагүй. Ард түмний ой тоонд шингэтэл сур­талдсан тоон амлалтыг тэд өөрс­дийнхөө нас шиг тод санан хүлээж суугаа гэдгийг дахин нэг ан­хааруулах нь миний үүрэг, шаардах нь сонгогчдын эрх. Амлалтуудыг хэ­рэгжүүлэхдээ санхүү, эдийн засгийн бодит боломжоо түшиглэх нь зүй ёсны хэрэг ч ард түмний хэлдэгчлэн “Ам алдвал барьж болдоггүй ээ”. Амлалтаа хэрэгжүүлэх нь та бүхний хэнтэй ч хуваалцашгүй үүрэг” гэж. Үнэ­хээр ч түүнийг “Оюутолгой” ХХК-ийн Төлөөлөн удирдах зөв­лөлд Монголын талыг төлөөлнө” гэх мессеж ца­цаг­дахаас өм­нө­хөн ард түм­ний төлөөлөл улс­төрчдөөс ам­лалт нэхэн сан­дар­гасан. Энэ бол зургаан жи­лийн өмнө Н.Ба­габандийн зүгээс улстөрчдөд сануулж, бас за­хиж хэлсэн үгний бодит биелэл байв. 

“Бурхны бү­тээлд ч бяцхан зас­вар хэрэгтэй бай­даг” гэдэг. Учир иймээс Н.Ба­габандийг хувь хүн талаас нь харцгаая. Түүнд хувь хүний үнэ­лэмж, үнэ цэнэ, гэр бүл, хамгийн гол нь ирээдүй бий. Тиймээс түүнд ч гэсэн мөн­гө хэрэгтэй. Стра­тегийн орд газ­руудад титэм үз­лээ нэвтрүүлэх ам­биц нь ч байж, суу­хын аргагүй бол­гож байгаа. Экс Ерөнхийлөгч энэ тухайгаа Тө­рийн тэргүүний ал­баа өгөхөөс өм­нө улстөрчдөд дуул­гаж амжсан. “Оюу­толгой, Тавантолгой дээр талцаж, цаг алдаж болохгүй шүү” хэмээн сануулсан ч удаатай. Тэр үгийг эргэн саная. “Гадаадын хө­рөнгө оруулалтыг уул уурхайн сал­барт татаж, хамтарсан аж ахуйн нэгж байгуулан үр ашигтай ажиллуулахын төлөө ухаан зарж, идэвхийлэн ажиллах шаардлагатай байна. Сүүлийн жилүүдэд гадаадын хөрөнгө оруулалт тус салбарт нэмэгдэж байгаа ч бусад салбарт, ялангуяа боловсруулах чиглэлээр дорвитой өсөхгүй, цаг алдаж байгаа” гэж. Төрийн тэргүүний албаа төд удал­гүй шилжүүлэхийнхээ өмнө хам­гаас чанга хэлсэн үг нь энэ байв. Тиймээс амлалт нэхэгчид эр­хэм гишүүдэд нэхэл хатуутай шаард­лага тавихтай зэрэгцэн тэр­бээр хэлсэн үгнийхээ хариуг ава­хаар иржээ. Сонирхолтой нь түүний экипажийн нэр “Н.Багабанди ба хамтарсан Засгийн газар”. Гүй­цэтгэх засаглалын бодлого то­дорхойлогчид өмнийн говь дахь баялгийн орд руу төрийн нэрийн өмнөөс түүнийг илгээхээр болжээ. Тэгэхээр Н.Багабанди хэмээх Мон­голын экс Ерөнхийлөгчийн хувиар энэ эрхэм гадаадын хөрөнгө оруу­лагчидтай нүүр тулж таарна. Бо­лохгүй нь ч юу байх вэ. Нударга биш, зангараг мэдрүүлэх бодлого эл үйл явцаас мэдрэгдэж байна. Экс Ерөнхийлөгч “Бузар аргаар ол­сон булга нөмөрч явснаас ариун хөлсөөрөө олсон адсага нө­мөр­сөн нь дээр” хэмээх үзлээ “Титэм үг”-ээр тунхагласан. Энэ үг түүний зүгээс ард түмэнд өгсөн ёс суртахууны шинж чанартай маш том амлалт. “Хийгүй Ерөнхийлөгч” хэмээгддэгийнх нь бодит шалгуур Оюутолгойд хийх тоглолтууд нь байх юм. Үг хэлэхдээ хийгүй байдаг ч үйлдэл гаргахдаа хийгүй байх эсэхийг нь ард түмэн үүгээр сорино. “Өөрсдийн цаг хугацааг нэр төртэй эзэгнэе”. Н.Багабандийн улс төрийн философийн удаахь зарчим нь ийм билээ.