70 дахь удаагаа зохион байгуулж буй Снүүкэрийн дэлхийн аварга шалгаруулах тэмцээний эхний шатны тоглолтууд үргэлжилсэн хэвээр байна. Өчигдрийн байдлаар дэлхийн хоёр шилдэг снүүкэрч дараагийн шатанд шалгарлаа. Дэлхийн чансааг тэргүүлэгч Ронни О’Салливан уржигдар 7:2-ын харьцаатай хятадын Лианг Вэнбог хошуучилсан бол өчигдөр үлдсэн 10 фрэймийн тулаанаа хийжээ. Эхний фрэймд дэлхийн гурван удаагийн аварга Салливан хожсон ч дараагийн дөрвөн фрэймийг хятадын снүүкэрч авсан нь английн шилдэг снүүкэрчийг хүнд байдалд оруулсан байна. Гэсэн ч “пуужин” хочтой Салливан 15 дахь фрэймд хожиж, улмаар 17 дэх фрэймд 73 оноо авч хожсоноор тоглолтын ялагч болжээ. Нэгэнт Салливан 10 фрэймд ялалт байгуулсан тул цааш тоглолт өрнөсөнгүй. Салливан дэлхийн аваргын 2-р шатанд Уэльсийн шилдэг снүүкэрч Марк Виллямстай тоглохоор болсон байна.
Дэлхийн зургаан удаагийн аварга Стив Дэвис, дэлхийн чансааны 16-д бичигдсэн Марк Кинг нарын англи снүүкэрчдийн тоглолт эхний шатны хамгийн сонирхолтой нь байлаа. Эхний фрэймд Марк Кинг ялалт байгуулсан ч 30 дахь дэлхийн аваргын тэмцээндээ оролцож байгаа Стив Дэвис дараагийн фрэймүүдэд хожин 6:4-өөр хошуучилж эхэлсэн байна. Харин өрсөлдөгчөөсөө 16 насаар дүү Марк Кинг дараагийн дөрвөн фрэймд хожсоноор 8:6-аар давамгайлж эхэлжээ. 15 дахь фрэймд Кинг хожиж яваад алдаа гаргасанаар санаачилга Стив Дэвисийн гарт бүрэн шилжсэн байна. Улмаар 52 настай Дэвис сүүлийн хоёр фрэймд 91 болон 70 оноог тус тус авсанаар 10:9-ийн харьцаатай хожин 2-р шатанд шалгарчээ. Стив Дэвис дараагийн шатанд дэлхийн аварга Жон Хиггинстэй оноолт таарсан байна.
Мөн Хятадын №1 снүүкэрч Дин Жунхуй,Английн Стюарт Питтмэнтэй эхний есөн фрэймийн тоглолтоо хийж 8:1-ийн харьцаатай хошуучлж байна. 23 настай Жунхуй одоо хоёр фрэйм хожиход л 1980 оноос хойш анх удаа английн тамирчинг эхний шатнаас мулталсан снүүкэрч болох аж.
Score studio.