Өнгөрсөн шөнө Сан Сиро цэнгэлдэхдээ Испанийн “Барселона” клубыг хүлээн авч тоглосон “Интер Милан” 3:1 харьцаагаар Аваргуудын лигийн хагас шигшээгийн эхний тоглолтдоо ялалт байгууллаа. Тоглолтын 19 дэх минутад Педро гоолдсоноор талбайн зочид тоглолтыг хошуучилж эхэлсэн боловч Уэсли Снейдер, Майкон, Диего Милито нарын гоол тооны харьцааг 3:1 болгон өөрчилжээ. “Барса”, “Интер” нар өмнө нь хэсгийн тоглолтод таарч тоглосон, тэгэхдээ италичууд өрсөлдөгчийнхөө хаалганд гоол оруулах боломж нэг ч тохиогоогүй юм. Харин өнгөрсөн шөнийн тоглолт Пеп Гуордиалагийн хувьд хүнд цохилт боллоо.
19 дэх минутад Максуэллийн зүүн жигүүрээс хаясан дамжуулалтыг Педро чулуу болгосноор тооны харьцааг нээсэн. Удалгүй “Интер”-ийн Снейдер Диего Милитогийн дамжуулалтаар тооны харьцааг тэнцүүлсэн бөгөөд тоглолтын хоёрдугаар хагас эхэлсний дараахан Майкон гоолдож, багтаа давамгайлал авчирсан юм. Харин 61 дэх минутад Милито өөрөө гоол оруулснаар тооны харьцаа 3:1 болжээ.
Исланданд дэлбэрсэн галт уулын улмаас бий болсон үнсэн үүл Европ тивийн агаарын замд хүндрэл учруулж, ихэнх нислэг хойшлогдож, цуцлагдсан учир 1000 км замыг хоёр өдрийн турш аяллын автобусаар туулсан Каталоны баг ийнхүү ялагдал хүлээснээр ирэх долоо хоногт Ноу Кэмп цэнгэлдэхэд болох хариу тоглолтод өрсөлдөгчөө 2:0-ээр хожих ёстой болж байна.
Энэ үдэш Германы Мюнхен хотноо Аваргуудын лигийн хагас шигшээгийн “Лион” болон “Баейрн Мюнхен” нарын тоглолт болно.

С.Цэлмэг