-Энэ бол ганц зүйл биш ээ, олон зүйлийг хамарсан цогц гэж болно. Харин аз бол нэг томоохон хэсэг нь. Дээр нь туршлага, хүсэл мөрөөдөл, бас “өлсгөлөн”. Чи үүнийг хэр их хүсч байна гэдэг үнэхээр том хүчин зүйл шүү. Хэрэв аваргын цом хүсч байвал дээрх хүчин зүйлс зайлшгүй хэрэгтэй.

-“Манчестер Юнайтед”, “Ливерпуль” клубууд хэн хэн нь Премьер лигт 18 удаа түрүүлээд л гацчихлаа. Зодог тайлахаасаа өмнө 19 дэх цомоо хүртэж, түүхэнд нэрээ мөнхлөх талаар юу гэж бодож байна?

-Шулуухан хэлэхэд, миний хувьд дөрвөн жил дараалан түрүүлнэ гэдэг асуудал илүү чухал. “МанЮ”, “Ливерпуль” хоёрын хооронд үнэхээр том өрсөлдөөн байгаа мэтээр фанатууд боддог. Гэтэл үнэндээ “Ливерпуль”-ийн амжилтаас давна гэдэг тийм ч чухал, сэтгэл догдлуусан зүйл биш.

-“Челси” болон “Арсенал” клубууд та нарын гол өрсөлдөгчид мөн үү?

“Челси”, “Арсенал” нар бүгд л сайн багууд. Гэхдээ миний хувьд “Ливерпуль” илүү анхаарал татдаг. Ялангуяа өнгөрсөн жилээс хойш.

-Хөлбөмбөгийн багууд амжилтыг худалдан авч болох уу?

-Миний бодлоор мөнгөөр амжилтыг худалдан авч болно. Гэхдээ урт хугацааны амжилт гаргахын тулд чамаас их зүйл шаардана. Бид тэр солилцоо, наймааны рекордыг нэг бус удаа эвдэж байсан. “Блэкбурн” Алан Ширерийг худалдан авч, лигт түрүүлж байсан, дараа нь Роман Абрамович “Челси”-г авснаас хойш их мөнгө зарцуулсан. Гэхдээ залуу тоглогчид, цаашид өсөх ирээдүйтэй залуу тоглогчид чухал.
-Алтан цом өргөх бодит боломж байна. Энэ үед гол өрсөлдөгчдийнхөө тоглолтыг телевизээр үздэг үү?

-Би хэдэн долоо хоногийн өмнө “Челси”, “Манчестер Сити” хоёрын тоглолтыг үзэж байсан юм. Тэгээд “Челси” гоол оруулах үеэр нь би телевизээ унтраачихсан. Гэтэл багийн анд маань утасдаад, Сити хоёр дахь гоолоо оруулчихлаа гэсэн. Харин би эхний гоолынх нь талаар ч мэдээгүй байсан шүү. Ер нь миний сэтгэл санааны байдал ямар байгаагаас л шалтгаалдаг.

-Криштиан Рональду багаас явчихлаа. “МанЮ” бараг түүхэндээ анх удаа хүссэн тоглогчоо бусдад алдсан байх?

-Тийм ээ, дэлхийн шилдэг тоглогч багаа орхиход сонин л юм билээ. Гэхдээ энэ л “МанЮ”-гийн цаад мөн чанар юм шүү дээ. Тэр яваад өгсөн, харин дасгалжуулагч залуу, цангасан тоглогчдодоо итгэж, тэдэнд боломж олгохыг хүссэн.  Бид гоолын машин явчихлаа энэ тэр гэж огтхон ч санаа зовоогүй. Учир нь Юнайтед-д үргэлж боломж олддог. Коули /Эндрью Коул/ явсан, Рүүд /ван Нистелроой/ явсан, Рональду ч явлаа. Тэглээ гээд бид гоол оруулж л байгаа биз дээ.

-Рүүнигийн гавьяа, нөлөөний талаар дурдвал?

-Тэр “МанЮ”-д байсан домогт тоглогчдын адилаар маш чухал үед гоол оруулдаг. Марк Хьюз, Эрик Кантона, Рональдо, Брайн Робсон, Рой Кин нар ч гэсэн. Тэд бүгд хэрэгтэй үед ид шид бүтээдэг. Уейн ч гэсэн ялгаагүй. Лионель Месси, Рональду нарын адилаар Уейн бол дэлхийн шилдэг гурван хөлбөмбөгчийн нэг шүү дээ.

С.Цэлмэг