Испанийн шигшээ багийн довтлогч Фернандо Торрес гэмтлийн улмаас энэ улирлын үлдсэн тоглолтод оролцох боломжгүй болжээ. Ингэснээр “Алтан жаал” Торрес хоёр сар хүрэхгүй хугацааны дараа эхлэх ДАШТ-ээс өмнө амжиж формондоо орохын тулд чамгүй хичээх хэрэгтэй юм. Торресийн хүчин зүтгэж буй “Ливерпуль” клубын мэдэгдсэнээр Торрес ням гаригийн үдэш өвдөгний мэс засалд орсон бөгөөд зургаан долоо хоног орчим хөлбөмбөгийн ногоон талбайгаас хөндий байх шаардлагатай гэнэ. Ингэснээр 26 настай испани довтлогч Премьер лигийн улирлын үлдсэн гурван тоглолт, мөн Испанийн “Атлетико Мадрид”-тай хийх Европын лигийн хагас шигшээ тоглолтыг өнжих юм.
FIFA-гийн 19 дэх удаагийн дэлхийн аварга шалгаруулах тэмцээн зургадугаар сарын 11-нд эхлэх бөгөөд Испанийн шигшээ баг тав хоногийн дараа буюу 16-нд нээлтийн тоглолтоо Швейцарийн багийн эсрэг хийх юм. Тиймээс Торрест хагалгааны дараах гам барих хугацаа дууссаны дараа дэлхийн аваргын эхний тоглолт хүртэл хоёр долоо хоногийн хугацаатай боломж олдож байна. Харин шигшээ багийн дасгалжуулагчид зургадугаар сарын 1 гэхэд 23 хүний бүрэлдэхүүнтэй шигшээ багийн тамирчдаа эцсийн байдлаар нэрлэх учиртай юм.
Сонирхуулахад, Европын аварга испаничууд ДАШТ-ий өмнө тавдугаар сарын 29-нд Австрид Саудын Арабын багтай, зургадугаар сарын 3-нд Өмнөд Солонгосын багтай, улмаар зургадугаар сарын 8-нд Испанийн Мурсия хотноо Польшийн шигшээ багтай нөхөрсөг тоглолт хийнэ.

С.Цэлмэг