Өнөөдөр үдээс хойш хуралдсан Засгийн газрын ээлжит хуралдаанаар сүүлийн үед ерөнхий боловсролын сургуулийн хүүхдүүд үдийн цайнаасаа удаа дараа хордлого авсан талаар хэлэлцжээ. Өнөөдрийн байдлаар Засгийн газар үдийн цай хөтөлбөрийн хүрээнд хүүхдүүдэд өгч байгаа нэг өдрийн хоолны мөнгийг 400 төгрөгт барьж байгаа. Гэвч энэ мөнгөөр хүүхдүүдэд чанартай хүнс авахад хүрэлцэхгүй учир сургуулиуд баталсан төсөвт нь таарсан хүнсийг л авч өгч байгаа гэдэг. Үүнээс болж хүүхдүүд чанар муутай хүнснээсудаа дараа хордож байгаа учир Засгийн газрын хуралдаанас үдийн цайнд өгч хүнсний төрлөөс сүү, сүүн бүтээгдэхүүн гэх хадгалалтын хугацаа даадаггүй зарим нэрийн бүтээгдэхүүнийг хасахаар шийдвэрлэлээ.

Хамгийн сүүлд хордлого авсан Ховд аймгийн Булган сумын сургуулийн сурагчдад сургуулийн хүүхдүүдэд сургуулийн захиргаа үдийн цай хөтөлбөрт тусгагдаагүй нэр төрлийн хүнс өгсөн нь тогтоогдоод байгаа. Тиймээс Ховд аймгийн Засаг даргад үүрэг өгч сургуулийн захирал, холбогдох хүмүүст харуицлага тооцохыг мөн энэ өдрийн хуралдаанаас Боловсрол, соёл шинжлэх ухааны сайд С.Отгонбаярт үүрэг болгосон байна. Харин Монгол-Оросын хамтарсан 3-р сургуулийн захирлыг ажлаас нь чөлөөлөх шийдвэрийг салбарын сайд нь гаргасан ч сургуулийн захирал шүүхэд хандсанаас хариуцлага тооцох асуудал шүүхийн шийдвэр гартал түр хойшлоод байгаа. Мөн түүнчлэн Засгийн газар Үдийн цай хөтөлбөрыг цаашид үргэлжлүүлэхдээ төв суурин газруудад хүнсний шинжилгээны лаборатори байгуулах шийдэлд хүрсэн байна.

Б.Алтансүх