Италийн Сери А лигийн гол төлөөлөгчдийн нэг “Рома” өнгөрсөн шөнө “Аталанта”-г 2:1 харьцаатай хожсоноор аваргаа хамгаалан өрсөлдөж буй “Интер Милан” лигийн тэргүүллээ “Рома”-д алдлаа. Улирлын тоглолтууд эхэлснээс хойш өдгөөг хүртэлх дийлэнх хугацаанд лигийн хүснэгтийг тэргүүлж байсан Жозе Моуриньогийн “Интер” ийнхүү улирал дуусахад таван тоглолт дутуу байхад нэг онооны зөрүүтэй болж байна.
Нийслэл Ром хотын олимпийн цэнгэлдэхэд болсон тоглолтод Мирко Вучинич, Марко Кассетти нарын эхний хагаст оруулсан гоол тооны харьцааг 2:0 болгосон ч 53 дахь минутад “Аталанта”-гийн довтлогч Тирибоччи гоолдож, тооны харьцааг 2:1 болгожээ. Мөн өнгөрсөн шөнө “АС Милан” Сан Сиро цэнгэлдэхдээ “Катания”-г хүлээн авч тоглон, 2:2 харьцаатай тэнцсэн бол “Ювентус” 1:0-ээр “Кальяри”-г буулган авчээ.

С.Цэлмэг