BBC телевизийн сэтгүүлчид өнгөрсөн гуравдугаар сарын дундуур манай улсад зочилж, Бээжингийн олимпийн аварга, Дэлхийн аварга шалгаруулах тэмцээний мөнгөн медальт, Монгол Улсын Хөдөлмөрийн баатар Э.Бадар-Ууганы тухай нэвтрүүлэг хийгээд буцсан билээ. Тэгвэл BBC телевизийнхэн саяхан олимпийн аваргатай холбогдож, түүний тухай нэвтрүүлэг бэлэн болсныг дуулгасан байна.
Тус телевиз Лондонгийн олимпод зориулж, дэлхийн шилдэг 26 тамирчныг онцлон тусгай нэвтрүүлэг бэлтгэж байгаа бөгөөд тэдгээр шилдгүүдийн нэгд олимпийн аварга Э.Бадар-Ууган багтсан юм. Э.Бадар-Ууган аваргыг тусгай нэвтрүүлэгтээ урьсан BBC телевизийнхэн цөөнгүй хүний бүрэлдэхүүнтэй Монголд зочилсон бөгөөд түүний бага нас, багш дасгалжуулагч, бэлтгэл сургуулилтын орчин, чөлөөт цаг гээд олон сэдвийг нэвтрүүлэгтээ багтаажээ.

Б.Энх