АНУ-ын автомашин үйлдвэрлэгч их гурвалын нэг “General Motors” компани өнгөрсөн оны зургаагаас арванхоёрдугаар сар хүртэлх зургаан сарын хугацаанд 4.3 тэрбум ам.долларын алдагдал амссан гэдгээ мэдэгдлээ. Туйлын хүнд хэцүү үеийг даван туулсан тус компанийн хувьд дээр дурдсан зургаан сарын хугацаа нь дампуурлын аюулт үеийг дөнгөж давж гараад байсан үе юм. “General Motors” компанийн санхүүгийн албаны дарга Крис Лидделлийн хэлэхдээ “Бид 2010 онд ашигтай ажиллах боломж олдоно гэдэгт найдаж байна” гэжээ. Тус компани өнгөрсөн онд зохион байгуулалт, бүтцийн хувьд бүрэн шинэчлэл хийж, АНУ-ын засгийн мэдэлд орсон бөгөөд өдгөө компанийн 61 хувийг засгийн газар эзэмшиж байгаа юм.