NBA-ын “Торонто Рэпторс”-ын шилдэг тоглогчдын нэг Крис Бош талбай дээр авсан гэмтлийн улмаас нүүрэндээ мэс засал хийлгэжээ. “Рэпторс”-ын мэдэгдсэнээр Бош лхагва гаригт Кливлэндийн төв эмнэлэгт доктор Фрэнд Папайн удирдлага дор нүүрэндээ мэс засал хийлгэж, хамраа тэгшлүүлсэн байна. Тэрбээр эмнэлэгт нэг хоног хэвтэх ба хэзээ Канад руу буцах болон энэ улирлын үлдсэн тоглолтод оролцох эсэх нь тодорхойгүй байна.
Улирлын тоглолтууд өндөрлөхөд таван тоглолт дутуу байгаа ба “Торонто Рэпторс” дорно конференсийн жагсаалтын наймдугаарт бичигдээд байгаа юм. Тэрбээр энэ улиралд нэг тоглолтод дунджаар 24.3 оноо, 11 удаагийн самбараас бөмбөг авалт гүйцэтгэжээ. “Торонто”-гийн онооны машин гэгддэг Крис Бош мягмар гаригийн үдэш болсон “Торонто Рэпторс”, “Кливлэнд Кавалиэрс” нарын тоглолтын үеэр гэмтэл авсан бөгөөд тоглолт 113:101 харьцаатай “Кавалиэрс”-ийн ялалтаар өндөрлөсөн юм.

С.Цэлмэг