“МанЮ”-гийн довтолгооны гол хүчин болсон Уейн Рүүни гэмтэлтэй учир талбайд гараагүй бөгөөд үзэгчдийн суудлаас тоглолтыг үзэж суугаа нь харагдсан. Үнэхээр ч Рүүнигүйгээр “Улаан чөтгөрүүд”-ийн довтолгоо асуудалтай байгаа нь илт анзаарагдаж байлаа. Харин түүнийг орлож залуу довтлогч Федерико Македа талбайд гарсан. Харин итали мэргэжилтэн Карло Анчелоттигийн тухайд гол түлхүүр болох Дидье Дрогбаг сэлгээний суудалд нөөж, 69 дэх минутад талбайд гаргасан ба Зааны ясан эрэгийн довтлогч үүргээ биелүүлж, 79 дэх минутад гоолдсон юм. Хэдийгээр отон тоглолтод орсон байсан ч хажуугийн шүүгч анзаараагүй учир Дрогбагийн гоолыг орсонд тооцож, тооны харьцаа 2:0 болсон. Тоглолтын эхний гоолыг 20 дахь минутад Жо Коул оруулсан юм. Дрогбагийн гоолоос хойш ердөө хоёр минутын дараа “Цэнхрүүд” хаалгандаа бөмбөг алдсан, харин гоолын эзэн нь итали залуу авьяастан Македа байв. “Юнайтед”-ийн дасгалжуулагч Сэр Алекс Фергусон тоглолтын үр дүнд сэтгэл дурамжхан байгаагаа илэрхийлээд, тоглолтын дараа “Миний ойлгохгүй байгаа ганц зүйл бол хажуугийн шүүгч. Үнэхээр түүний буруу байсан. Ийм хэмжээний тоглолтын шүүх бүрэлдэхүүн нь чадварлаг байх хэрэгтэй, харин өнөөдрийн тухайд тийм байж чадсангүй. Үнэхээр ядмаг үзүүлэлт. Улирал дуусахад таван тоглолт дутуу байна. Харин Челси жолооны суудалд, биднээс хоёр оноо, дөрвөн гоолоор илүү байгаа. Тэд биднээс илүү давуу нөхцөлд байгаа нь хэнд ч ойлгомжтой. Гэхдээ бидний зүгээс үүний хариуг нь барьж чадна гэдэгт итгэлтэй байна. Үлдсэн таван тоглолтод бүгдэд нь ялалт авах хэрэгтэй” гэжээ.