“Бар жилийн тэргүүн дэвжээ тодруулах” барилдааны эхний тойргийн барилдаанууд өнгөрсөн долоо хоногийн бямба гаригт болсон бол энэ сарын 3, 4-ний өдрүүдэд “Бөхийн өргөө”-нд болох гэж байна. Энэхүү барилдаанд оролцож байгаа 15 дэвжээнээс ирэх хоёр өдрийн барилдаанд гурав нь өнжиж, 12 дэвжээ хэсэг дотроо тойргоор барилдах юм байна.
Энэ барилдаанд дэвжээ болгоны шилдэг бөхчүүд оролцож байгаагаараа онцлог бөгөөд дөрөвдүгээр сарын 3-ны өдрийн барилдаанд оноолт таараад буй Архангай аймгийн “Бөхбилэгт” дэвжээний бүрэлдэхүүнд даян аварга Г.Өсөхбаяр, у.з Д.Рагчаа, у.х Т.Мөнгөнцоож тэргүүтэй шилдэг 6 бөх зодоглох бол тэдэнтэй Говь-Алтай аймгийн “Хантайшир” дэвжээнээс у.г Н.Ганбаатар шилдэг начин Ду.Батбаяр, Д.Лхагвадорж, Ж.Бат-Эрдэнэ нарын зургаан бөх тойргоор барилдах юм. Дашрамд сонирхуулахад, Г.Өсөхбаяр аварга Н.Ганбаатар гарьд нар өмнө огт таарч барилдаж байгаагүй ажээ.
Өвөрхангай аймгийн багт у.а Д.Ганхуяг, у.з Б.Сайнбаяр, а.а Б.Сангисүрэн нарын бөхчүүд багтах бол Дорнод, Хэнтий аймгийн у.н Д.Цогзолдорж, Ж.Гансүх тэргүүтэй бөхчүүдтэй барилдах юм. Харин Завханы багийнхан болох у.з М.Баяржавхлан, у.н Ц.Сумъяабээс, Ш.Уламбаяр, Л.Нямсүрэн, а.а Ш.Жаргалсайхан тэргүүтэй бөхчүүд Сэлэнгэ аймгийн “Таван Хан” дэвжээний бөхчүүд болох улсын өсөх идэр начин Г.Эрхэмбаяр, уран барилдаант начин Н.Бүрэнбаатар, шилдэг начин Т.Өсөх-Ирээдүй нарын хүчтэнүүдтэй тойргоор барилдана.
Харин ням гаригт Хөвсгөл, Булган аймгийн бөхчүүдийн халз барилдаан болно. Хөвсгөл аймгийн багт у.а Х.Мөнхбаатар, у.х Г.Элбэг, залуу начин Ц.Содномдорж тэргүүтэй шилдгүүд багтаж байгаа бол Булганы галд залуу заан М.Өсөхбаяр, харцага Д.Баасандорж, а.а А.Отгонбаатар нар багтжээ. Мөн энэ өдөр у.з Ц.Мягмарсүрэн, Ч.Батзориг, у.х Т.Амартүвшин нараар магнайлуулсан хүчтэнүүд Завханы шилдгүүдтэй тойрч барилдах юм.

Барилдааны хуваарийг танилцуулъя.
Дөрөвдүгээр сарын 3-ны бямба гариг:
 
“А” хэсэгт
1.Өвөрхангай –Дорнод, Хэнтий аймгийн нэгдсэн баг
2.Завхан -Сэлэнгэ
3.Ховд -өнжинө.
“В” хэсэгт
1.Сүхбаатар –Дундговь
2.Хөвсгөл- Баян-Өлгий, Дархан -Уул
3.Булган -өнжинө.
“С” хэсэгт
1.Архангай – Говь-Алтай
2.Төв – Говийн хүчтэн
3. Увс – өнжинө
Дөрөвдүгээр сарын 4-ний ням гариг:
“А” хэсэгт
1.Ховд – Завхан
2.Өвөрхангай –Сэлэнгэ
3.Дорнод Хэнтий – өнжинө.
“В” хэсэгт
1.Булган – Хөвсгөл
2.Сүхбаатар – Баян-Өлгий, Дархан Уул
3.Дундговь – өнжинө.
“С” хэсэгт
1.Архангай –Говийн Хүчтэн
2.Төв  -Увс
3.Говь-Алтай – өнжинө.

Б.Энх