3,417.49
Монгол Улсаас Канад Улсад суугаа Элчин сайд Т.Залаа-Уул Ванкувер хотноо ажиллах үеэрээ Бритиш Колумб мужийн Ричмонд хотын дунд сургуульд зочлов. Элчин сайд Т.Залаа-Уул тус сургуулийн захирал Жим Мклеод, багш Кевин Матени болон сурагчдад сайн үйлсийн аяны арга хэмжээнд нь амжилт хүсч талархал илэрхийлэв. Элчин сайд Монголыг зорих багш сурагчдад монгол орны талаар дэлгэрэнгүй танилцуулан халуун дотно яриа өрнүүлж, тэдний сонирхсон асуултад хариулсан байна. Энэхүү уулзалтад Ричмонд хотын захиргаа, боловсролын албаны төлөөлөгчид болон Канадын Бритиш Колумб мужид суугаа Өргөмжит Консул Тобин Роббинс нар оролцжээ.Ричмонд хотын дунд сургуулийн 30 сурагч, багш, эмч нараас бүрдсэн баг удахгүй Монгол Улсад хүрэлцэн ирж, Сэлэнгэ аймгийн Зүүнхараа суманд Хүүхэд, сурагчдын сургалтын төв барихад оролцох аж. Энэхүү барилгыг барихад зориулж тэдгээр сурагчид гурван сарын турш хандивын аян зохион байгуулж нийт 17,000 канад доллар цуглуулсан байна. “Глобал Перспектив-Канад” хэмээх олон улсын, сайн дурын, төрийн бус байгууллагаас зохион байгуулдаг дээрх арга хэмжээний хүрээнд Ричмонд хотын дунд сургуулиас сайн үйлсийн аяныг дэлхийн 10 гаруй улсад өрнүүлээд байгаа гэнэ.
Уншигч та “Глобал Перспектив-Канад” байгууллагаас Ричмонд хотын дунд сургуультай хамтран Сэлэнгэ аймгийн Зүүнхараа суманд барих Хүүхэд, сурагчдын сургалтын төв”-ийн тухай сайн үйлсийн аян болон бусад мэдээллийг http://globalperspectivescanada.com/ цахим хуудсанд зочилж дэлгэрүүлэн үзэж болох юм байна шүү.
Г.ДАРЬ
Холбоотой мэдээ