Хөвсгөл аймагт найман настай охиныг хүчирхийлж, хэргийн ул мөрөө баллахын тулд амийг нь хөнөөн цогцсыг мөчилж хаясан жигшүүрт хэрэг өнгөрсөн онд гарсан. Уг хэрэгт Н.Мөнх-Оргилыг холбогдуулан шалгаж, өнгөрсөн оны арванхоёрдугаар сард Чингэлтэй дүүргийн шүүхээс түүнд цаазын ял оноосон юм. Яллагдагч Н.Мөнх-Оргил өнөөдрийг хүр­­тэл хэр­гээ хү­лээх­гүй бай­гаа бө­гөөд түүний ар гэ­рийн­хэн ч анхан шат­­ны шүүхийн шийд­­вэрийг эсэр­гүүцэж давж заалдах өргөд­лөө өгсөн юм. Түүнд хол­богдох хэргийг өчиг­­дөр нийслэлийн Шүү­хэд хянан хэлэл­цээд анхан шатны шүүхийн шийдвэрийг хэвээр батал­жээ. Н.Мөнх-Ор­гил анхан шатны шүү­­хээс цаазын ял сонссоны дараа Э.Ган­бат өмгөөлөг­чийг нэмж авсан бай­на. Давж заалдах шатны шүүх хуралд Э.Ганбат өмгөө­лөгч Өмнөговь аймагт хурал давхацсан тул шүүх хуралд товыг мэдээгүй байснаас хүрэлцэн ирж амжаагүй. Н.Мөнх-Оргилд холбогдох хэргийг Нийслэлийн шүүхэд хэлэлцэж дууссаны дараа түүний өмгөөлөгч Р.Насанжаргалаас цөөн асуултад хариулт авлаа.

-Түүнийг анхнаас нь өмгөөлж байсан хүний хувьд давж заалдах шатны хуралд ямар саналтай орсон бэ?

-Н.Мөнх-Оргил хэргээ хүлээх­гүй байгаа. Бас ар гэрийнхэн, түү­нийг таньдаг хүмүүс ч гом­долтой байгаа юм. Тиймээс хэргийг дахин шалгаж, нягтлах хэрэгтэй гэж үзээд нэмэлт мөрдөн байцаалтад буцаах, дахин шинжээч томилох саналтай оролцсон ч шүүх бүрэлдэхүүн хэрэгсэхгүй болголоо.

-Анхан шатны шүүх хурлаас хойш Н.Мөнх-Оргилтой  та уулз­сан уу. Биеийн байдал нь ямар байна?

-Цаазын ял сонссон ч гэсэн өмгөөлөгч нь уулзах эрхтэй. Би гурван удаа очиж уулзсан. Н.Мөнх-Оргил эхнээсээ хэргээ хүлээгээгүй. Ар гэрийнхэн нь бас гомдолтой байгаа. Түүний ар гэрийнхэн өмнөх шүүх хурлын үеэр л түүнтэй уулзсан. Түүнээс хойш нэг ч удаа уулзаагүй, хуулиараа хориотой шүү дээ. Биеийн байдал нь хэвийн.

-Н.Мөнх-Оргил хэвлэлд ярилцлага өгмөөр байна гэж  ар гэ­рийн­хэндээ хэлсэн   байсан. Та­ньд энэ хүсэлтээ хэлсэн үү?

-Түүнд ярилцлага өгөх бай­тугай, ар гэрийнхэнтэйгээ уулзах эрх байхгүй. Анхан шатны шүүх хурал болоогүй байхад гэрийнхэндээ тий­мэрхүү зүйл ярьсан байж магадгүй юм. Шүүхийн шийдвэр гарснаас хойш гурван удаа уулзахад надад тийм зүйл яриагүй гэв.

Уг хэргийн талаар эргэн сөх­вөл Хөвсгөл аймгийн харьяат Н.Мөнх-Оргил нь өнгөрсөн оны дөрөвдүгээр сарын 8- 22 өдрүүдэд 13-14 насны  гурван  охин хүчир­хийлж, санаатай алахыг завдсан  гэх үндэслэлээр, мөн өнгөрсөн  оны тавдугаар сарын 03-нд Хөвсгөл аймгийн Мөрөн суманд  найман настай охин хүчиндсэн, бэлгийн дур хүслээ ёс бусаар хангасан, хүнийг санаатай алах гэмт хэргийг давтан үйлдсэн гэж буруутган  яллах дүгнэлт үйлдсэн юм.  Н.Мөнх-Оргилд холбогдох хүчин, хүн амины хэргийн анхан шатны шүүх хурал өнгөрсөн оны арванхоёрдугаар сард болж улсын яллагч Ц.Жадамбаагийн төвлөсөн цаазын ялыг оноосон. Улсын яллагч Т.Жадамбаа “Хэдий­гээр Н.Мөнх-Оргил хэргээ хүлээх­гүй байгаа ч түүнийг яллах нотлох баримт хангалттай бүрдсэн” гэж байв. Харин түүний ар гэрийнхэн хилс хэрэгт ял шийтгүүлсэн  гэж үзэж буй.