Хүүхдийн ”Forte piano” улсын уралдаан болж байна

Хуучирсан мэдээ: 2010.03.23-нд нийтлэгдсэн

Хүүхдийн ”Forte piano” улсын уралдаан болж байна

Хүүхдийн ”Forte piano” улсын уралдаан болж байна
Монголын хүүхдийн ордноос жил бүр төгөлдөр хуур сонирхогч хүүхдүүдийн дунд улсын уралдаан зохион байгуулдаг билээ. Өнгөрөгч бямба гаригт эхэлсэн уралдаанд бяцхан хөгжимчид найман нас хүртэл, 9-10 нас, 11-13, 14-ээс дээш насныхан гэсэн ангиллаар өрсөлдөж байна. Оролцогч хүүхдүүд уралдааныг зохион байгуулах комиссоос өгсөн ая, Ф.Шопенийн нэг зохиолоос тоглох юм байна. Хүүхдийн ордны төгөлдөр хуурын багш М.Мөнгөнцэцэг, Т.Туул, Д.Одончимэг нарын шавь нар бэлтгэсэн зохиолоо маш чадварлаг тоглож байсан юм. Төгөлдөр хуурынхаа товчлуурт арай ядан хүрч байгаа бяцхан охид чадварлаг тоглохоос гадна тайзны жүжиглэлтийг сайн эзэмшсэн нь үзэгч олны хайрыг татаж байсан юм.  Нэг ангилалдаа 20-25 хүүхэд өрсөлдөж байгаа. Хүүхдүүд адил ая тоглож байгаа ч “Дунд хэсэгтээ нэг нот алдлаа. Минийх арай илүү байлаа” гэж бие биеэ шүүмжилж байв. Хүүхдийн ордны  төгөлдөр хуурын дугуйланд нэгхэн  жил суралцаж байгаа  гэх  охид, хөвгүүд монгол ардын дуунаас гадна Л.Бетховений “Сурок”, В.Моцартын “Тема вариаций”-г тоглож байлаа. 9-10 насны ангилалд М.Мөнгөнцэцэг багшийн шавь М.Цэцэгдарь, А.Оюунгэрэл, Т.Туул багшийн удирдсан А.Амин-Эрдэнэ нар үеийнхнээсээ илүү авьяастай гэдгээ харуулж байв.
Монгол-Оросын хамтарсан  III сургуулийн  сурагч М.Цэцэгдарь “Анх удаа энэ тэмцээнд оролцож, анх удаа
тайзан дээр гарч байгаа болохоор хүмүсээс айж байсан. Хүмүүс алга ташаад байхаар нь баярлалаа. Манай багш надад олон гоё ая зааж өгдөг. Би гэртээ төгөлдөр хууртай болохоор чөлөөт цагаараа хөгжмөө давтдаг” гэв. Монголын хүүхдийн ордны багш М.Мөнгөнцэцэг “Эцэг эхчүүд хүүхдүүдээ авьяаслаг, төгс төгөлдөр хүн болгохын төлөө их анхаардаг болсон. Манай дугуйланд  суралцах хүсэлтэй хүүхдүүд их байдаг. Монгол хүүхдүүдийн нэг онцлог нь юмыг маш богино хугацаанд сурдаг. Сонсгол сайтай байдаг юм” гэв. Уралдаанд нийт ная гаруй хүүхэд оролцсон бөгөөд өнөөдөр шилдгээ шалгаруулах гэнэ.
Х.ХАНГАЛ
Энэ мэдээнд өгөх таны сэтгэгдэл?
0
ЗөвЗөв
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!
NewsMN Гар утасны хувилбар Татах
NEWS.mn

Мэдээллийн эх сурвалж