“Монголфильм групп”  ХХК-ний хамт олны хийхээр төлөвлөж буй дараагийн бүтээл нь үлгэрийн кино. Энэ кино нь тус группийн ойрын 10 жилийн уран бүтээлийн төлөвлөгөөний нэг бөгөөд монгол ардын аман зохиол дээр тулгуурлан үндэсний хэл соёл, зан заншил, хувцас эд өлгийн зүйлсийг болон эх орныхоо байгалийн үзэсгэлэнг дэлхий дахинаа сурталчлах, хойч үеийнхний үндэсний ухамсрыг сэргээж, монголоороо бахархах үзлийг төлөвшүүлэх зорилготой бүтээл юм.

Монголын кино урлагийн түүхэнд Германтай хамтарсан “Алтан өргөө” 1961 он, “Ховдгийн гай” 1964 он /богино хэмжээний кино/, ”Бушхүүгийн үлгэр” 1979 он зэрэг тоотой хэдхэн үлгэрийн кино хийсэн нь тухайн үеийн хүүхэд багачууд төдийгүй насанд хүрэгчдийн үзэх дуртай, үлгэр дуурайлтай кинонууд болсон билээ. Дашрамд хэлэхэд  “Монголфильм групп”-ийн уран бүтээлчдийн зураачийн уран чадварын багш нь ”Бушхүүгийн үлгэр” уран сайхны киноны найруулагч, зохиолч, зураачаар ажилласан УГЗ, кино зураач П.Цогзол байжээ.

Тиймээс шинэ уран бүтээлээрээ багшийнхаа 80 насны ойд бэлэг барих аж.