“Нэг ардчилал”-ынхан нам дотроо цахиур хагална

Хуучирсан мэдээ: 2010.04.06-нд нийтлэгдсэн

“Нэг ардчилал”-ынхан нам дотроо цахиур хагална

Намынхаа хууччуулд “Эвэр ургав, ээж хэрэггүй болов” хэмээн гоочлуулах болсон Ардчилсан намын залуучуудын бүлэг буюу "Нэг ардчилал" клубийнхэн өнгөрсөн амралтын өдрүүдэд хотоос гарч хуралдсан тухай бид мэдээлсэн. Тэдний энэ хурал саяхан болж өнгөрсөн ҮЗХ-ны сонгуулийн дараа болсон нь учир шалтгаантай бололтой. ҮЗХ-ны ээлжит сонгуулийн дүнг баталгаажуулах Нийслэлийн Ардчилсан нам, ҮЗХ-ны хурал хараахан зарлагдаагүй байгаа ч “Нэг ардчилал”-ын залуус үүнд ямар нэг хэмжээгээр бэлтгэж эхэлсэн бололтой. “Нүхт” цогцолборт болсон энэ хурлын үеэр Ардчилсан намын залуучууд нам дотор өөрсдийн байр сууриа нэгтгэж, дуу хоолойгоо хүчтэй болгох талаар ярилцжээ. Тэд “Алийн болгон фракци болж тоглосон энэ хэдэн нөхдийн гар хөлд гүйж, заримынх нь түрүүвч болж, заримынх нь шаврыг зуурах вэ. Одоо өөрсдийгөө хөгжүүлж, өөрсдийнхөө шаврыг зуурах цаг болсон” гэлцэж, зарим нь ч бүр “Нам хагалаад байгаа энэ хэдэн хөгшчүүлээс намаа аврах хэрэгтэй” гэж хүртэл хурцалжээ. “Хүүхэд ийм дээрээ хөөрхөн” гэдэг шиг.
“Нэг ардчилал”-ын энэ цуглралтад Ардчилсан намын ҮЗХ-ны 40 гаруй гишүүд оролцож, гэрээ байгуулан гарын үсэг зурцгаасан гэх мэдээлэл байна. Харин намынх нь томчуул, фракцийн лидерүүдийн хувьд тэдний ямар гэрээнд гарын үсэг зурав гэдгээс илүүтэй ҮЗХ-ны гишүүдээс хэн хэн үүнд нэгдэв гэдэг нь анхаарал татаж байгаа гэнэ. “Нэг ардчилал” клубийг УИХ-ын гишүүн Лу.Гантөмөр, Х.Тэмүүжин нар анх байгуулсан. Харин одоо Ардчилсан намын ҮЗХ-ны 44 гишүүн, тухайлбал Ховд аймгийн Ардчилсан намын дарга Б.Пүрэвдорж, Баянзүрх дүүргийн Ардчилсан намын дарга Д.Пүрэвдаваа, Хан-Уул дүүргийн Ардчилсан намын дарга Б.Ариунболд, ГХЯ-ны дэд сайд Б.Болор, Ерөнхийлөгчийн зөвлөх А.Ганбаатар, Чингэлтэй дүүргийн Ардчилсан намын дэд дарга Б.Батбилэг, Сүхбаатар дүүргийн Ардчилсан намын дэд дарга Д.Бадарсан, Нийслэлийн иргэдийн хурлын төлөөлөгч Э.Тамир нар орж байгаа юм байна. “Нэг ардчилал”-ын залуус саяхан болсон ҮЗХ-ны ээлжит ротациар ҮЗХ-н дахь суудлөнхаа тоог ахиулаад зогсохгүй, ҮЗХ-ны гадна ч 50-60 залуусыг өөртөө нэгтгээд байгаа юм гэнэ. Өөрөөр хэлбэл саяхан байгуулагдсан Ардчилсан Хүчний Холбоотой өрсөлдөх бас нэгэн байгууллага Ардчилсан нам дотор “жигүүрээ дэвж” эхэллээ. Эрт гарсан чихнээс орой гарсан эвэр урт гэдэгчлэн Алтангадас гэдэг нэг фракцийн эсрэг нэгдэж байгаа АХХ-ноос илүү "Нэг ардчилал"-ын залуус нам дотроо цахиур хагалж магадгүй.
Б.ЗАЯА
NewsMN Гар утасны хувилбар Татах
NEWS.mn

Мэдээллийн эх сурвалж