Ванкуверийн олимпод хамгийн амжилт муутай оролцсон багаар оросын баг тодорч байх шиг. Тэд 10-аас доошгүй алтан медаль авах зорилготойгоор Канадад хөл тавьсан бол энэ зорилгынхоо хагасыг ч биелүүлж чадсангүй. Багийнхан нь багагүй найдвар тавьж байсан сноубордист Станислав Детков энэ төрөлд медальт байранд орох боломжоо алдлаа. Тэр эхний гараандаа Францын тамирчнаас 0,96 секундээр хоцорч, дараагийн гараандаа амжилтаа ахиулж чадалгүй байсаар ийнхүү байнд ч үгүй, банзанд ч үгүй хоцров. Хүрэл  медаль авсан Францын Матье Боззетто түүнээс 3,99 секундээр түрүүлсэн.

Энэ төрөлд аваргын алтан медалийг эзэн орны сноубордын тамирчин Жейси Жей Андресон авсан бол мөнгөн медалийг Австрийн Бенжамин Карл хүртсэн юм.

 Л.ЗОЛБАЯР