2010 оны 2 сарын 22
УИХ-ын дарга Д.Дэмбэрэл БНСУ-д айлчлахаар өнөө өглөө Улаанбаатараас морджээ. Тэрбээр энэ сарын 26-ныг хүртэл айлчлах хугацаандаа БНСУ-ын Үндэсний Ассамблейн дарга Ким Хен О-той уулзалт хэлэлцээ хийж, Хууль зүйн Байнгын хорооны дарга Юү Сөн Хо, БНСУ-ын Гадаад бодлого, худалдаа, нэгдлийн Байнгын хорооны дарга Пак Жин нартай уулзаж хоёр орны харилцаа, хамтын ажиллагааны асуудлаар санал солилцоно. Мөн  БНСУ-ын Ерөнхийлөгч Ли Мён Багт бараалхах юм байна.
УИХ-ын дарга  Инчхоны чөлөөт эдийн засгийн бүс,  Генги муж,  Чэжү аралд зочилж, БНСУ-ын Үндэсний Ассамблейн “NATV” телевиз, “Жүн Ан Илбо” сонинд тус тус  ярилцлага өгөх юм байна. Айлчлалын бүрэлдэхүүнд  УИХ-ын гишүүн, УИХ дахь Монгол-Солонгосын парламентын бүлгийн гишүүн Д.Одхүү, УИХ-ын гишүүн Д.Тэрбишдагва, Д.Хаянхярваа, Д.Энхбат, С.Эрдэнэ, УИХ-ын Тамгын газрын Ерөнхий нарийн бичгийн дарга Ц.Шаравдорж болон албаны бусад хүн багтжээ.
Д.ОЮУН