…Англичууд “Бурхан чамтай байг!” буюу “God be with you!” гэсэн 12 үсэгтэй 4 үгээ товчилсоор 7 үсэг, 2 үгтэй “Гүүд баая(Good bye)” болгосон байх юм. Бид ч ялгаагүй “Махчин, мангасгүй тайван сайхан байна уу?” гэсэн 5 үг, 34 үсэгтэй мэндийн үгээ “Сонин сайхан юу байна?” гэсэн 4 үг, 18 үсэгтэй болгож товчилсон. Үүний домгийг сонирхуулбал, эрт балар цагт хүний мах иддэг махчин, мангас хэмээх хоёр аймшигтай амьтан байжээ. Хүмүүс махчин, мангас хоёргүй амар сайхан амьдрахыг ихэд хүсдэг байв. Тэгээд “Махчин, мангасгүй тайван сайхан байна уу?” гэж мэндлэх ёс тогтоожээ. Удалгүй тэр амьтад ч дарагдаж, махчин, мангас гэж хэлэхийг цээрлэж, сонин, сайхан гэдэг хоёр үгээр сольж, мэндийн үгээ засжээ. Тийм аймшигтай амьтад байдгийг мартуулахгүй байх, бас тэднийг хүний гарт атгуулж номхруулахаар хөөрөгний хоёр мөрөнд махчин, мангас хоёр буюу сонин, сайхан гэдэг хоёр амьтны дүрийг дуурайлган сийлсэн гэнэ.

Энэ үг “Сонин сайхан юу байна?” гэдгээс гадна Амар тайван байна уу? Тайван байна уу? Амар байна уу? мэтийн олон хувилбартай болсоор байна.

“Егөөтэй 99 тайлбар” номын “Ажлаасаа хоцорсны арыг та даах уу?” өгүүллийн хэсгээс