Шведийн засгийн газар Хойд Солонгосоос 40 гаруй жилийн тэртээх өрөө төлөхийг шаардсан боловч хариу өгөөгүй байгаа тухай Voice of America мэдээллээ. 

Шведийн Экспортын зээлийн агентлагаас гаргасан 2016 оны тайланд дурдсанаар Хойд Солонгосын талаас Шведэд төлөх өрийн хэмжээ 2.7 тэрбум крон буюу 330 сая ам.долларт хүрчээ. Швед нийт 16 орноос авлагатай бөгөөд Хойд Солонгос дангаар нийт өрийн 45 хувийг эзэлж буй гэнэ. Түүнчлэн Хойд Солонгосын дэглэм нэг ч удаа өрийн төлөлт хийж байгаагүй аж.

Voice of America мэдээлснээр умардын өр нь 1974 онд Шведийн авто үйлдвэрлэгч Volvo компаниас захиалж авсан 1000 ширхэг автомашины төлбөр гэнэ. Тухайн үеийн 600 сая швед кроны зээлийн хүү бодогдсоор 43 жилийн дараа ийнхүү 2.7 тэрбум кронд хүрсэн байна.

Шведийн Экспортын зээлийн агентлагийн хэвлэлийн төлөөлөгчийн ярьснаар Шведийн талаас жилд хоёр удаа өрөө төлж барагдуулахыг шаарддаг боловч хариу тайлбар өгсөн удаагүй гэнэ.

С.ЦЭЛМЭГ