Дэлхийн хамгийн залуу удирдагч | News.MN

Дэлхийн хамгийн залуу удирдагч

Хуучирсан мэдээ: 2017.10.19-нд нийтлэгдсэн

ХҮМҮҮС

Дэлхийн хамгийн залуу удирдагч

Дэлхийн хамгийн залуу удирдагч

Түүнийг Себастиан Курц гэдэг. 31 настай. Дэлхийн хамгийн залуу удирдагч.

Консерватив үзэл баримтлалтай Ард түмний намыг тэргүүлж, парламентын сонгуульд ялалт байгуулсан тэрбээр удахгүй тангараг өргөж, Австрийн Канцлераар томилогдоно. 38 настай, Ирландын Лео Вардаркар, бас 39 настай, Францын ерөнхийлөгч Эмманэуль Макроноос ч тэр дүү. Үе залгамжилсан дэглэмийг үргэлжлүүлэн авч яваа Хойд Солонгосын залуу удирдагч ч түүнээс хоёр насаар ах.

Нас залуу, цус шингэн хэдий ч тэр улс төрийн тулхтай, үзэл баримтлалдаа үнэнч, зоримог бөгөөд тууштай нэгэн гэж үнэлэгддэг. 2013 онд тэр Европын орнуудын хамгийн залуу Гадаад хэргийн сайд болсон юм. 27 настайдаа тэр цөмийн хөтөлбөрийн асуудлаар Иран болон АНУ, Хятад, ОХУ, Франц, Герман, Британи тэргүүтний түүхэн хэлэлцээг нутагтаа зохион байгуулж байсан. Хэлэлцээр ч амжилттай болж, Тегераны цөмийн хөтөлбөрийг хязгаарлах түүхэн гэрээг талууд Венад үзэглэсэн билээ.

Курц консерватив үзэл баримтлалтай намынхаа өнгө төрхийг өөрчлөхийн зэрэгцээ цагаачлал болон интеграцчиллын асуудлаар онцгойлон дуугарч, барууны хэв шинж рүү хэлбийх болжээ. Өмнө нь тэр Балканы хойг дахь цагаачдын урсгалыг хааж, хууль бус цагаачдыг нутгаасаа гаргах, дэлхий нийт, тэр тусмаа хөгшин Европын толгойн өвчин болоод буй дүрвэгсдийн хямралыг зогсоохыг эрх баригчдаас шаардаж байсан юм. Түүнчлэн сүм дуган, шашны байгууллагыг гадны байгууллагууд санхүүжүүлдэг явдлыг бүрмөсөн хориглох тухай хууль батлах, Австри дахь исламын шашны сүмүүдэд зөвхөн герман хэл дээр хэвлэгдсэн Коран судрыг зөвшөөрөх, олон нийтийн газар бурка /толгойноос хөл хүртэл ороож өмсдөг, нүүр халхалдаг, исламын шашинтнуудын хэрэглэдэг, сул өмсгөл/ өмсөхийг хориглох зэрэг хатуу чанга бодлого баримтлахыг уриалж байв.

Үүнийх нь төлөө Курцын тэргүүлсэн консерватив намыг үнэт зүйлээ алдаж, хэт барууны үзэл баримтлалтай Австрийн Эрх чөлөөний намтай ялгаагүй болсон гэж шүүмжлэх хүн ч байдаг.

Себастиан Курц 1986 оны наймдугаар сарын 27-нд Австрийн нийслэл Вена хотод төржээ. Хотын ажилчин ангийнхан голдуу суурьшсан Майдлинг дүүрэгт хүүхэд насаа өнгөрүүлсэн, одоо ч тэндээ амьдардаг. Түүний аав Жозеф инженер, ээж Элизабет нь багш мэргэжилтэй. Себастиан өөрөө айлын ганц хүүхэд ажээ.

2004 онд дунд сургуулиа төгсөөд Курц цэргийн алба хаажээ. Залгуулаад ямар нэг зэрэг дэв горилолгүй долоон жил сурсны эцэст 2011 онд Венийн их сургуулийн хуулийн ангиа орхиод, улс төрд хөл тавихаар шийдсэн байна. Энэ хугацаанд тэр Австрийн Ард түмний намын залуучуудын байгууллагын тэргүүнээр сонгогдож, 2010-11 онд Вена хотын зөвлөлд орж ажиллав. 2011 оны дөрөвдүгээр сард Курц Интеграцын асуудал эрхэлсэн төрийн нарийн бичгийн даргаар томилогджээ. Тэгээд л хуулийн сургуулиа орхихоор шийдэж, өөрийгөө улс төрд бүрэн дайчлахаар зориглосон байна.

Хэдхэн жилийн дотор Курц урлагийн од шиг л гялалзах болжээ. 2013 оны парламентын ерөнхий сонгуульд тэр хувь нэр дэвшигчийн хувьд байж болох хамгийн өндөр санал авч, Австрийн парламентад сонгогдов. Түүгээр ч зогсохгүй Австрийн Гадаад хэргийн сайдын алба хаших болж, өөрийн хүсэлтээр интеграцчиллын асуудлыг хамруулан эрхлэх болжээ. Тэр улсынхаа түүхэн дэх хамгийн залуу сайд, харин Европын тавцанд хамгийн залуу Гадаад хэргийн сайд болов.

Дипломат албанд ажиллахдаа тэр цохон тэмдэглэх түүхэн үйл явдлын гэрч төдийгүй гол дүр нь болсон удаа цөөнгүй бий. Европын холбоон дахь Австрийн дэмжлэгийг нэмэгдүүлэх шат дараатай алхам хийж, түүний удирдлага дор Ираны цөмийн хөтөлбөрийг хязгаарлах анхан шатны хэлэлцээрийг Австри улс зохион байгуулсан юм. Мөн тэр Гадаад хэргийн сайдаар томилогдсон эхний жилдээ Европын зөвлөлийн Сайд нарын хороог ахалж байв. Улмаар Европын зөвлөлийн 30 орны Гадаад хэргийн сайд нарыг урьж, Украины хямралын асуудлаар хэлэлцэж байсан юм.

Курцын сонгуулийн гол сэдэв цагаачдын урсгалыг хаах, хилийн хяналтыг сайжруулах, цагаачдад олгох тусламж, халамжийг хязгаарлах асуудалд чиглэж байв. Харин одоо Курц тэрхүү хэлж, ярьж, уриалан дуудаж, шүүмжилж байсан бүхнээ өөрийн биеэр хэрэгжүүлнэ гэдгээ мэдэгдээд байгаа.

Мөн тэр Австрийн улс төрийг бүрэн шинэчилнэ гэж амласан. Чухам ямар утга агуулгатай гэдгээ тэр харин дэлгэрүүлсэнгүй.

Австрийн эдийн засаг сүүлийн зургаан жилийн дээд төвшинд байгаа, ажилгүйдэл хамгийн доод төвшинд буюу 5.7 хувьтай байгаа. Ийм үед улс төрд шинэчлэл авчирна гэснийг шинжээчид өөр өөрийн өнцгөөс тайлбарлаж байна.

Себастиан Курцыг онцгой авьяастай удирдагч, улс төрч хэмээн цоллож, дэлхийн томоохон хэвлэлүүд Канадын ерөнхий сайд Жастин Трюдо, Францын ерөнхийлөгч Эммануэл Макронтой зүйрлэн бичиж байна.

Макронтой адил нь тэр сонгуульд намын биш, харин хувь хүний улс төр хийж оролцсон. Намынхаа мөрийн хөтөлбөрийн оронд тэр “Себастиан Курцын мөрийн хөтөлбөр” гэгчийг боловсруулсан байсан юм.

Австрийн сэтгүүлч Гернот Бауэр түүний “поп од”-той зүйрлэсэн нь бий. “Тэр яг л Жастин Бибер шиг. Хүмүүс түүнтэй селфи хийх гэж өчнөөн цаг зарцуулдаг. Сонгуулийн сурталчилгааны явцад бараг 20 хувь нь зураг авхуулах, селфи хийхэд зарцуулагдсан” гэж тэр бичжээ.

Себастиан Курц гэрлээгүй. Гэхдээ найз бүсгүйтэй. Түүний бүсгүйг Сюзан Тьер гэдэг. Авсрийн Сангийн яаманд ажилладаг аж. Курц 18 настайдаа түүнтэй танилцсан, өдгөө хамт амьдардаг тухай Германы Der Spiegel мэдээлжээ.

С.ЦЭЛМЭГ

"Болор дуран"-аар шалгав.
Энэ мэдээнд өгөх таны сэтгэгдэл?
2
ГайхмаарГайхмаар
0
ЗөвЗөв
0
ХахаХаха
0
ХөөрхөнХөөрхөн
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

9 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2017-10-19 202.21.106.143

Сайхан хосууд байна. Эмэгтэй нь түүнийг ямар нүдээр харж байна вэ. Үнэхээр түүнийг сорон шиг татжээ. Хөгшин европынхон залхуурч жаргаж цагаачлал аван нүб-р тэтгүүлсний гор нь гарч өөрсдөө хэцүүдэж байна даа. Нийгмийн халамжийг нь бизнесийг нь цагаачид авч хэрэглээд даварч байна. Бодлогоо хязгаарлахаас өөр аргагүй л дээ.

Avatar

Иргэн 2017-10-19 27.123.214.104

3 жилийн дараа энэ нэр хүндтэйгээ байвал сайн залуу юм гэж үнэлэх хэрэгтэй. Европ даяараа цагаачдаас залхаж байгаа энэ үед түүн дээр дөрөөлж, барууны үндэсэрхэг үзлийг сурталчилж гарч ирсэн залуу. Германд АФД гэх мэт. Одоо Австри эдийн зэсгийн хувьд маш сайн явж байгаа нь эрх барьж байсан социал демокрад намын гавъяа. Олон жил эрх барьсан болон цагаачлалын зэрэг асуудлаас болж энэ намын нэр хүн буруудсан нь хорвоогийн жам.

Avatar

Зочин 2017-10-19 103.26.194.71

Энгэж их залуужих сайн зүйл яав ч биш ээ. Шинэ Зеландын ерөнхий сайд бас 37 настай эмэгтэй гэсэн

Avatar

Zochin 2017-10-19 115.187.88.2

Delhiin zaluu udirdagch bish l de.delhii deer bgaa austria ulsiin zaluu udirdagch bnaa

Avatar

Жүжигчин баймаар сайхан залуу юм 2017-10-19 202.9.40.61

Мундаг өв тэгш төржээ

Avatar

Зочин 2017-10-19 150.129.141.237

Энд бид бүхэн эмгэнэн гашуудаж байна дор ямар сэтгэгдэл бичээд байгаа юм бэ ойлгосонгүй. Монгол хүний уужуу тэнүүн үзэл бодол яачаа вэ???? Монгол Улсын Засгийн газар байна уу??? Гадаад харилцааны яам байна уу??? Бидний хоёр хөрш ОХУ, БНХАУ – хоёр ямар иргэнээ хаана явна юу хийж явна гэдгийг маш сайн мэддэг юм байна лээ. Жишээ Сирт ажиллагаа явуулахын өмнө ОХУ-ын тэдэн иргэн байна гэх жишээний, БНХАУ-ыг тэрбум хүн амтай бүх хүнээ хянаж чадаж байна. Монголд өнөөдөр яаж байна Сонгууль дөхөөд ирэхээр л Монгол Улсын иргэдээ санадаг даана ч нөхдүүд нь Монгол руу буцаачихана гэсэн айлттай итгэлийн гал нь бөхчихсөн тийм л болгож байна даа. Бид өөрстөө буруутай гэж болохгүй энэ чинь бүхэл бүтэн МОНГОЛ гэж улс яригддаг юм. Аав ээж, ах дүү төрөл төрөгсдөд нь гүн эмгэнэл илэрхийлье.

Avatar

Зочин 2017-10-19 150.129.141.237

Энд бид бүхэн эмгэнэн гашуудаж байна дор ямар сэтгэгдэл бичээд байгаа юм бэ ойлгосонгүй. Монгол хүний уужуу тэнүүн үзэл бодол яачаа вэ???? Монгол Улсын Засгийн газар байна уу??? Гадаад харилцааны яам байна уу??? Бидний хоёр хөрш ОХУ, БНХАУ – хоёр ямар иргэнээ хаана явна юу хийж явна гэдгийг маш сайн мэддэг юм байна лээ. Жишээ Сирт ажиллагаа явуулахын өмнө ОХУ-ын тэдэн иргэн байна гэх жишээний, БНХАУ-ыг тэрбум хүн амтай бүх хүнээ хянаж чадаж байна. Монголд өнөөдөр яаж байна Сонгууль дөхөөд ирэхээр л Монгол Улсын иргэдээ санадаг даана ч нөхдүүд нь Монгол руу буцаачихана гэсэн айлттай итгэлийн гал нь бөхчихсөн тийм л болгож байна даа. Бид өөрстөө буруутай гэж болохгүй энэ чинь бүхэл бүтэн МОНГОЛ гэж улс яригддаг юм. Аав ээж, ах дүү төрөл төрөгсдөд нь гүн эмгэнэл илэрхийлье.

Avatar

Tumur 2017-10-19 17.47.12.11

Юу вэээээ?

Avatar

Гүнбилэг 2017-10-19 34.48.24.19

Дандарааааан

NewsMN Гар утасны хувилбар Татах
NEWS.mn

Мэдээллийн эх сурвалж