Москва хотын шүүхийн шийдвэрийг үндэслэн ОХУ-ын Мэргэжлийн хяналтын байгууллага хоёр цахим сайтын үйл ажиллагааг хаасан байна. Энэ хоёр сайт нь сурах бичиг болон уран зохиолын номнуудыг зохиогчийн зөвшөөрөлгүйгээр нийтэлж байсан учраас үйл ажиллагааг нь бүрмөсөн хаах шийдвэрийг шүүх гаргажээ.

Хэвлэлийн “Эксмо”, “Просвещение” компаниуд шүүхэд гомдол гаргасны үндсэн дээр ийнхүү шийдвэрлэжээ. Шүүхийн шийдвэрт нэр дурдагдсан хоёр сайтын нэр torrentino.com, 11book.ru бөгөөд дунджаар 398 мянган хандалттай байжээ. Мэргэжлийн хяналтын албаны мэдээгээр 600 орчим сайтын үйл ажиллагааг хаагаад байгаа аж.

Зохиогчийн эрхийн хуулиар интернэт сүлжээгээр зохиогчийн эрхийн зөрчилтэй контентыг түгээх ёсгүй юм. Ихэнх тохиолдолд сайтыг эрхлэн гаргагчид хаах шийдвэр гаргахаас өмнө зөрчлөө арилгадаг байна. Харин зөрчлөө арилгах шаардлагыг биелүүлээгүй бол шүүх эрх нь зөрчигдсөн гомдогчийн талд шийдвэр гаргадаг.

Эх сурвалж: РИА НОВОСТИ