Ази-Номхон далайн парламентын 19 дүгээр чуулганы төлөөлөгчид Улс төр, аюулгүй байдлын асуудлууд сэдэвт нэгдүгээр бүгд хуралдаанаа эхлээд байна. ОХУ-ын төлөөлөгчдийн тэргүүн, ОХУ-ын Холбооны Хурлын Холбооны зөвлөлийн дарга С.Миронов, БНХАУ-ын БХАТИХ-ын дэд дарга хатагтай Ян Жуньчи, Австрали, Камбож, Канад, Монгол Улс, Индонезийн төлөөлөгчид уг сэдвээр үг хэллээ.

Бүс нутгийн орнууд хамтын хүчээр халуун цэгийн асуудлуудаа шийдэх, хүний наймаа, терроризм, мансууруулах бодисын наймаатай хамтран тэмцэх ёстойг төлөөлөгчид онцолж байлаа. Монгол Улсын төлөөлөгч, УИХ-ын Хууль зүйн байнгын хорооны дарга Д.Одбаяр хоёр Солонгосын удирдлагууд хэлэлцээрийн ширээний ард суух болсон тухай баярт мэдээг авсныг тэмдэглээд Ойрхи Дорнодын орнууд шашны зөвшилцлийн аргаар сөргөөлдөөнт асуудлуудыг намжааж болохыг дурдлаа.
Одоо терроризм, хууль бус мансууруулах бодисын наймаа, зохион байгуулалттай гэмт хэрэгтэй тэмцэх асуудлаар чуулган үргэлжилнэ.