-Цонхыг тань хааж барьсан барилгын талаар уншигчид мэдэж байгаа байх. Танай байр өмнө нь ямар байсан тухай бэ?
-Манай байр 1963 онд ашиглалтад орсон. Олон жил би энэ байрандаа амьдарч байна. Хот одоогийнх шиг утаа, шороо ихтэй байгаагүй цагт үнэхээр сайхан байсан. Өглөө нар мандаж цонхоор тусч, өдөржингөө гэр маань дулаахан, гэрэлтэй байгаад, орой нар жаргаж байгаа нь цонхоор харагддаг байлаа. Урагшаа харахад чинь уул, мод, Зайсан толгой харагдаад л. Бүр дээхнэ үед урд уулнаас манай байрны гадаа буга ирж хэвтчихсэн байдаг байсан. Бид цонхоороо талх, боов шидэж өгөөд, ямар байсныг сайн санаж байна. Тэр үед байрныхаа гадуур мод тарьж, их сайхан зүлэгжүүлсэн. Гэтэл энэ зочид буудлын барилгыг барьж эхлэхэд тарьсан модыг бүгдийг нь тайрчихсан. 40 гаруй жил ургасан моддыг ганц өдрийн дотор юу ч үгүй болтол нь булгалсан гээд бод доо. Бас оршин суугчдийн усалж торддог байсан зүлэг нүдэн дээр нь хар шороо болж хувирсан. Тэгээд гаднаас гэрэл тусахаа байчихаар байр маань хүйтэн, чийгтэй, мөөгөнцөртэй болчихоод байна.
-Зэргэлдээх хоёр байшингийнх нь дунд бас зочид буудал барьж байгаа гэж сонссон?
-Тийм. Манай байрнаас гадна 15,16 дугаар байрны хооронд зочид буудал барих гээд “Цаст констракшн” газар аваад одоогоор барилгын ажил нь түр зогсчихсон байгаа. Хажуугийн 13 дугаар байрны орчимд ч зочид буудал бий. Ингээд зэрэгцээ гурван байшингийн завсар болгонд зочид буудалтай болж байгаа юм. Ямар гээчийн хот төлөвлөлтөөр яваад байгааг үнэхээр ойлгохгүй байна.
-Шүүхийн шийдвэр оршин суугчдын талд гарсан байх аа?
-Анх 2009 онд нийслэлийн Захиргааны хэргийн шүүхийн шийдвэрээр цонх хааж барьсан барилгын зөвшөөрлийг хүчингүй болгосон. Мөн энэ шийдвэрийг үндэслэн нийслэлийн Засаг даргын захирамжаар газар чөлөөлүүлэх шийдвэр гарсан юм. Одоогоор нийслэлийн Шүүхийн шийдвэр гүйцэтгэх алба шийдвэрийг албадан гүйцэтгэж байгаа гэсэн нэр төдий, юу ч хийхгүй байна. Энэ барилга миний судалж үзсэнээр 50 гаруй хуулийн 200 гаруй заалтыг зөрчсөн. Одоогоор байдал нам жим болчихоод байна. Барилгын ажлыг эсэргүүцэж дөрөв, таван жил хөөцөлдсөн хөгшид бид эрүүл мэндийн хувьд сайнгүй байна. Би л гэхэд одоо сувилалд эмчлүүлж байгаа. Хөгшид нарлаж суух талбай ч үгүй, гэртээ ороод ч нар үзэхгүй байхаар аргагүй шүү дээ.
-Одоо ямар шаардлага тавьж байгаа вэ. Барилгыг нь шууд буулгах боломжгүй болсон юм биш үү?
-Тийм л дээ. Энэ зочид буудал 7.8 тэрбум төгрөгийн өртөгтэй юм билээ. Одоо үүнийг буулгана гэвэл дуу чимээ, шороо тоос болоод барьж байсан үеэсээ ч илүүгээр биднийг зовооно биз. Тэгэхээр ерөөсөө оршин суугчид маань нөхөн төлбөр авъя гэж шийдээд байгаа. Бид чинь нар тусдаггүй гэртээ өдөржингөө гэрлээ асаана. Ийм байхаар чинь тогны мөнгө төлөхдөө хүртэл бид хохирч байгаа биз.
-Хохирлынхоо хэмжээг гаргачихсан юм уу?
-Үгүй ээ. Ямар байдлаар хохирч байгаагаа л судалж үзсэн. Байгаль орчин, эрүүл мэнд гээд 10-аад төрлийн хохирол амсч байна. Түүнээс биш яг одоо тэдэн сая төгрөг өг гээгүй.
Зохиогчийн эрх: