Замын хөдөлгөөнд оролцож буй тээврийн хэрэгслийг дугаарын хязгаарлалт бүхий бүсчлэлд өвөл, зуны улиралд шилжүүлдэг. Тэгвэл өнөөдөр буюу аравдугаар сарын 15-аас эхлэн дугаарын хязгаарлалт өвлийн бүсчлэлд шилжиж байна.

Нийслэлийн ИТХ-ын Тэргүүлэгчдийн 2014 оны арванхоёрдугаар сарын 15-ны өдрийн 225 тоот тогтоолоор улсын дугаарын хязгаарлалтын цагийн хуваарь, замын бүсчлэлд өөрчлөлт оруулсан. Энэхүү өөрчлөлтөөр дугаарын хязгаарлалтын цагийн хуваарийг улирал хамаарахгүй 08.00-20.00 цаг болгон өөрчилж, замын бүсчлэлийн хамрах хүрээг өвлийн улиралд багасгаж, зуны улиралд тэлэх зохицуулалт хийсэн юм.  Өөрөөр хэлбэл, өвлийн бүсчлэлийн дугаарын хязгаарлалт Офицеруудын ордноос Саппорогийн уулзвар, 32-ын тойргоос 120-ын уулзвар дотор дугаарын хязгаарлалт үйлчлэх юм байна.