АНУ-ын Элчин сайдын яам аливаа виз зуучлагч хувь хүн болон байгууллагатай хамтарч, тэднийг дэмжиж ажилладаггүй гэдгээ албан ёсоор мэдэгдлээ. Тиймээс “АНУ-ын Элчин сайдын яам, Консулын хэлтсээс виз гаргаж өгнө” гэж амлаж буй хувь хүн болон байгууллагад хандаж, тэдэнтэй холбогдохгүй байхыг анхааруулж байна.
Тэдгээр виз зуучлагчид АНУ-ын Элчин сайдын яам болон визний шийдвэрт нөлөөлөх ямар ч боломжгүй юм. Тэд “Виз гаргаж өгнө” гэж амлан иргэдээс их хэмжээний мөнгө шаарддаг байна. АНУ-ын визтэй холбогдолтой бүх мэдээллийг үнэ төлбөргүйгээр Элчин сайдын яамны https://mn.usembassy.gov/mn/visas-mn/ болон https://mn.usembassy.gov/mn/ цахим хуудаснуудаас англи болон монгол хэл дээр авах боломжтой. Танд хууль бус визний үйл ажиллагааны талаар ямар нэг мэдээлэл байвал UlaanbaatarFPU@state.gov хаягаар захидал ирүүлж мэдэгдэх боломжтой гэв.
Д.УУДАМ