Өмхий ханх тавьсан дулааны улирал өнгөрч, утааны улирал ирлээ. Хүйтний эрч нэмэгдэхийн хэрээр Улаанбаатарын утаа улам өтгөрч, агаарын бохирдол зөвшөөрөгдөх хэмжээнээс хэд дахин нэмэгддэг. Агаарын бохирдлоороо дэлхийд аман хүзүүдэж яваа Улаанбаатарыг утаанаас салгаж чадах аргыг хэн ч олоогүй байна. Хэдэн зуун, хэдэн тэрбум төгрөгийг “салхинд” цацсанаас өөрөөр өнгөрсөн 10 жилийн агаарын бохирдолтой хийсэн тэмцэл үр дүнгээ өгөөгүй юм.

Энэ жил 3,2 тэрбум төгрөгийг утааг бууруулахад төсөвлөсөн байна.  Үүнээс 2,8 тэрбум төгрөгөөр сургууль цэцэрлэгийн дотоод орчны агаарыг сайжруулахаар 350 орчим  “hepa” шүүлтүүрийг худалдан авч, тавихад бэлэн болжээ. “Цэвэр агаар” төслийн хүрээнд дэлхийн банкны санхүүжилтээр 750 ширхэг “hepa”  шүүлтүүрийг нэмж байршуулна гэсэн төлөвлөгөөтэй байгаа”-гаа Агаарын бохирдлыг бууруулах газрын орлогч дарга  А.Амарсайхан дуулгаад, 1600 тонн сайжруулсан түлшийг зорилтот бүлгийн иргэдэд тараахаар бэлтгэснээ хэллээ.

Нийслэлээс  сайжруулсан зуухыг гэр хорооллынхонд тараадаг байсан бол энэ жилээс дахиж тараахгүйгээр шийджээ. Утааг багасгахын тулд шалны халаалт хэрэглэхийг санал болгож байгаа ч харамсалтай нь, гэр хорооллынхон авах мөнгөгүй, боломжгүй гэсэн хариулт өгдөг аж. Тиймээс  Хотын ногоон хөгжил хариуцсан газраас Хөгжлийн банкныхантай санамж бичиг байгуулж, гэр хорооллынхонд шалны халаалтыг хөнгөлөлтэй нөхцөлөөр банкны зээлээр олгох асуудлыг судлахаар болсон гэж Нийслэлийн Засаг даргын Ногоон хөгжил агаарын бохирдлын асуудал хариуцсан орлогч Ж.Батбаясгалан хэллээ.

Агаарын бохирдол бол ганцхан төр засгийн асуудал биш. Иргэд, хувийн хэвшил хамтдаа зүтгэж байж, Улаанбаатарын агаарын бохирдлыг бууруулна.

Хувийн хэвшлийнхэн төр засгаас явуулж байгаа бодлогот сэтгэл дундуур байгаагаа илэрхийлж байлаа. “Төр засгаас  агаарын бохирдлыг бууруулна  гэж жил бүр ярьдаг ч дорвитой арга хэмжээ авдаггүй. Хэдэн зуух л тараадаг байх. Ард иргэдэд төрөөс зээл олгочихвол хүмүүсийн худалдан авалт ч  сайжирна. Энэ жил өнгөрсөн жилийнхээс илүү  олон  цахилгаан халаагуур оруулж ирэхээр төлөвлөсөн” гэж ”Абу Трейд” ХХК захирал Л.Батчулуун хэлэв. “Өнгөрсөн оны арваннэгдүгээр сараас эхэлж  монгол тулга зуухыг хийж эхэлсэн. Одоогоор 120 орчим айлд тавиад байна. Монгол гэрт 1кв, 2кв,3кв-аар ажиллана. Монгол гэрт тулганаас  өөр  төгс зохицох зүйл хаана ч байхгүй” хэмээн “Мөнхийн амар дулаан” компанийн захирал Г.Мөнхбат ярилаа.

Улаанбаатар хотын гэр хороололд  32 мянган хүн эмзэг давхаргад харъяалагддаг. Тэд нүүрсээ түлж чадахгүйд хүрэх нь бий. Тиймээс дугуй, тоосго түлж өвлийг давдаг өрх ч байна.

Улаанбаатарын утааг бууруулах хамгийн зөв шийдэл нь дагуул хотууд байгуулах гэдгийг албаны хүмүүс онцлох болсон. Зуух тарааж, түлш өглөө гээд утаа буурсангүй. Утаа бууруулах ухаалаг арга байна уу?