УИХ дахь Ёс зүйн дэд хороо өнөөдөр /2017.10.02/ хуралдаж тус хороонд ирсэн санал гомдлыг хэлэлцсэн байна. Тус хороонд УИХ-ын гишүүн Д.Гантулгатай холбоотой хоёр ч гомдол иржээ. Тодруулбал, УИХ-ын гишүүн Д.Гантулгад хүчиндүүлсэн гэх Ч.Наранзаяа болон “Өмгөөлөгчдийн Веритас Партнерс” ХХН-өөс УИХ-ын гишүүн Д.Гантулга нь хувийн асуудлаар Төрийн ордонд мэдээлэл хийсэн нь УИХ-ын гишүүний ёс зүйд хэр нийцэж байгааг тодруулж өргөдөл өгсөн байна.
УИХ дахь Ёс зүйн дэд хороо дээрх өргөдлүүдийн дагуу хуралдаж, УИХ-ын гишүүн Д.Гантулгад холбогдох хэрэг нь хуулийн байгууллагаар шалгагдаж байгаа, эцсийн дүгнэлт гараагүй учраас ямар нэг байр суурь илэрхийлэх, асуудлыг авч хэлэлцэх боломжгүй гэж үзсэн байна. Харин “Өмгөөлөгчдийн Веритас Партнерс” ХХН-өөс гаргасан УИХ-ын гишүүн Д.Гантулга хүчингийн хэрэгт холбогдож, энэ талаараа Төрийн ордонд мэдээлэл хийсэн нь ёс зүйд хэр нийцэх талаар хэлэлцэж, УИХ-ын гишүүн Д.Гантулгаас өөрөөс нь албан ёсны тайлбар авахаар болсон байна.
УИХ-ын гишүүн Д.Гантулга Төрийн ордонд хувийн асуудлаар мэдээлэл хийсэн, ингэхдээ ёс зүйд нийцэхгүй үг хэрэглэсэн асуудлаараа УИХ дахь Ёс зүйн дэд хороонд бичгээр тайлбараа гаргаж өгөх боломжтой юм байна.
Ш.ЧИМЭГ