Монголын Хөлбөмбөгийн Холбооны хамгийн нэр хүндтэй тэмцээнүүдийн нэг “Холбооны цом”-ын хагас шигшээгийн нэг тоглолт өнөөдөр 19:00 цагаас “Улаанбаатар сити”, “Эрчим” багуудын хооронд болно. “Эрчим” “Хүрхрээ үндэсний лиг”-ийн аваргын цомыг өргөх эрхээ дахин халаасалсан бол “Улаанбаатар сити” анх удаа медалийн болзол хангаад байгаа. Иймд багууд үндэсний лигийн амжилтаа “Холбооны цом”-ын медалиар ихэрлүүлэхийг хүсэх нь дамжиггүй. “Улаанбаатар сити” үүсгэн байгуулагдсан цагаасаа хойш “Эрчим”-тэй “Хүрхрээ үндэсний лиг”-ийн хүрээнд дөрөв тоглохдоо гурав хожигдож, нэг тэнцсэн. Тиймээс “Улаанбаатар сити” “Эрчим”-ийг анх удаа буулган авч, “Холбооны цом”-ын шигшээд шалгарахын тулд бүх хүчээ дайчилна. Харин З.Баттулга дасгалжуулагчаар удирдуулсан залуус 2015 онд “Хүрхрээ үндэсний лиг”, “Холбооны цом”-д зэрэг түрүүлсэн амжилтаа давтахыг хичээнэ. Энэхүү гал гарсан тоглолтыг та бүхэн МХБХ-ны цэнгэлдэх хүрээлэнд хүрэлцэн үнэ төлбөргүй сонирхохоос гадна mycujoo.tv-ээр https://mycujoo.tv/mongolia-football-federation?id=8703 шууд хүлээн авч үзэх боломжтой.

Эх сурвалж: МХБХ