Энэ сарын 18-ны өдрийн Аймгийн Засаг даргын Зөвлөлийн хурлаар аймгийн “Брэнд бүтээгдэхүүн”-ийг тодруулах, 2010 оны аймгийн “Сайн малчин”, “Тэргүүний тариаланч хамт олон”, “Тэргүүний хадланч” шалгаруулах болон бусад асуудал хэлэцэв. Удахгүй болох сар шинийн баярыг тохиолдуулан малаа өсгөж, ашиг шимийг нь нэмэгдүүлэн, үүлдэр угсааг сайжруулж буй малчид, хүн амыг эрүүл, аюулгүй, экологийн цэвэр  хүнсний бүтэгдэхүүнээр хангахын төлөө ажиллаж газрын өгөөжийг хүртэж буй тариаланч хамт олон, өөрсдийн хүч нөөц бололцоонд тулгуурлан өвөлжилтийн бэлтгэл хангах зорилгоор малын өвөс тэжээл бэлтгэж  орон нутгийнхаа нийгэм эдийн засгийн хөгжилд өөрийн хувь нэмрээ оруулж буй хадланчдаас бар жилийн сайчуудыг тодууллаа.

Хөлөнбуйр сум Гомбосүрэн Батжаргал, Баян-Уул сум Михлай Өлзийтөмөр, Матад сум Жамба Гомбосайхан, Чойбалсан сум Дэндэв Бямбасүрэн, Цагаан-Овоо сум Дамдин Пүрэв, Хэрлэн сум Гармаа Жаргалсайхан, Булган сум Гомбо Нямсүрэн, Гурванзагал сум Загд Чинбат нар аймгийн “Сайн малчин”-аар шалгарлаа. Мөн Хэрлэн сумын Б.Оюунцэцэг захиралтай “Сэмбо” нөхөрлөлийн хамт олон 2010онд хураасан ургацын хэмжээ аймгийн дунджаас 40 хувиар давуулан биелүүлсэн үзүүлэлтээр аймгийн тэргүүний тариаланч хамт олноор шалгарсан байна. Баяндун сум Б.Дугарсүрэн сумын нөөцийн 100 тонн өвс бэлтгэхээс 70 тонныг дангаараа бэлтгэн өгснөөс гадна багийн нөөцийн 14 тонн байгалийн хадлан бэлтгэсэн амжилтаар аймгийн тэргүүний хадланч боллоо. Шагналыг сарын шинийн баярын үеэр аймаг сумын удирдлагууд гардуулна.