Хорь дахь удаагийн номын баяр ирэх баасан, бямба гаригт буюу есдүгээр сарын 22, 23-ны өдөр төв талбайд болно.

Энэ үеэр номын дэлгүүрүүд 5-90 хувийн хямдралтай худалдаа явуулахаа зарлажээ.

‘Ulaanbaatar Book Fair’ номын баярын нэг онцлог нь зохиолч, орчуулагч, эрхлэн гаргагчид өөрийн биеэр ном, бүтээлээ иргэдэд танилцуулдаг бөгөөд уншигчид хүсвэл гарын тэдний гарын үсгийг зуруулах боломжтой. Номын баярт,  “Интерном”, “Аз хур”, “Монсудар”, “Тагтаа”, “Непко”, “Мир”, ”Импати ХХК”, ”Books in English”, “Болор судар” зэрэг компаниас гадна нэрт зохиолчид, хуучин номын худалдаа эрхлэгчид оролцоно.

‘Интерном’ компани 20-40 хувийн хямдралтайгаар ном худалдаалах бөгөөд англи хэл дээрх номуудыг ердөө 3000 төгрөгөөр зарах ажээ. Мөн “Монсудар” хэвлэлийн газрын номууд энэ асарт байрлана. 

“Аз хур” номын дэлгүүрийн номууд хамгийн багадаа 20 хувь хямдрах бололтой. Дашрамд сануулахад, есдүгээр сарын 29-нөөс аравдугаар сарын 1-ний өдрүүдэд “Аз хур” номын их дэлгүүрт 72 цагийн 72 хувийн хямдралтай худалдаа болох юм.

Өдөрлөгийн хүрээнд гэр бүлийн уншлагыг дэмжсэн уулзалт, ярилцлага, “Эх хэл, өв соёлоо дээдлэхүй” зөвлөгөө, Тэгш ой тохиож буй зохиолчдын уран бүтээлийн үзэсгэлэн, уран уншлага, номын төрөлжсөн үзэсгэлэн, “Хүүхдүүдээ дэлгэцээс аваръя” аяны үйл ажиллагаа, номын хямдралтай худалдаа, зохиолчдын гарын үсэгтэй номын худалдаа, номын төрөлжсөн үзэсгэлэн, эцэг эх, хүүхдүүдийг оролцуулсан хөгжөөнт тоглоом, Номын сангийн тухай хуулийн танилцуулга болон номын бэлэг, урамшуулалтай тэмцээн, уралдаан болно гэдгийг зохион байгуулагчид мэдээллээ.

20 дахь удаагийн номын баяр баасан гаригийн 11:40 цагт эхэлж, баасан, бямба гаригийн 18:00 цаг хүртэл үргэлжилнэ.

Энэ жилийн номын баярыг “Гэр бүлийн уншлагыг дэмжье” уриан дор Ерөнхийлөгчийн Тамгын газар, нийслэлийн Соёл, урлагийн газар, “Номын соёлт ертөнц” ТББ хамтран зохион байгуулж байна.

Д.УУДАМ