Нийслэлийн хэмжээнд өчигдрийн байдлаар ахуйн гал түймрийн таван дуудлага ирсэн байна. Тухайлбал, Хан-Уул дүүргийн 10 дугаар хороонд иргэн Х-гийн Ланд-80 загварын автомашин бүрэн, 4х7 метрийн хэмжээтэй гараашийн  дээврийн хэсэг шатаж байна гэсэн дуудлагын дагуу Аврах, гал унтраах 18 дугаар ангийн гал сөнөөгчид унтраажээ. Мөн Баянзүрх дүүргийн 21 дүгээр хороонд  6х16 метрийн хэмжээтэй байшингийн дээврийн хэсэг, Баянгол дүүргийн 16 дугаар хороонд  иргэн П-ын 3х8 метрийн хэмжээтэй байшингийн эд хогшил, дотор тал, дээврийн хэсэг, иргэн Д-ын 4х7 метрийн хэмжээтэй байшингийн дээврийн хэсэг тус тус  шатаж байсныг Аврах, гал унтраах 10 дугаар ангийн I тасаг унтраасан байна.

Сүүлийн үед ахуйн гал түймрийн гаралт буурахгүй байгаатай холбогдуулан бага насны хүүхдийг орон гэртээ харгалзах хүнгүйгээр орхиж явахгүй байх, үнс нурмаа ил задгай хаях зэрэг галын болзошгүй аюулаас сэрэмжтэй байхыг Нийслэлийн Онцгой байдлын газраас анхааруулж байна.

Дашрамд дурьдахад, он гарснаас хойш ахуйн гал түймрийн дуудлага нэмэгдэх хандлагатай байгаа нь хүйтний эрч эрс чангарч байгаатай холбоотойгоор гэр хорооллын айлуудын галлагааг нэмэгдсэн, автомашин, техник хэрэгслээ зориулалтын бус хэрэгслээр асаах зэрэг иргэдийн санамсар болгоомжгүй үйлдлээс болж гарч байна. Сүүлийн нэг сарын хугацаанд нийслэлийн хэмжээнд хувийн хэвшлийн өмчид 137 удаа,  төрийн өмчид 44 удаа гал түймэр гарч, нийслэлийн Онцгой байдлын газрын Аврах, гал унтраах ангиуд гал түймрийн нийт 201 удаагийн дуудлага хүлээн авчээ. Мөн энэ хугацаанд   гал түймрийн аюулд нэг том хүн, хоёр хүүхэд амь насаа алдаж, нэг хүн түлэгдсэн байна.