
Компанийн нийгмийн хариуцлагын хүрээнд, ард иргэд болон нийгмийн сайн сайхны төлөө хэрэгжүүлэх энэхүү өргөн хүрээтэй төслийн санаачилгыг Монгол Улсын Засгийн газар, холбогдох яамд болон Нийслэлийн засаг даргын тамгын газар дэмжин хүлээж авч, улмаар энэ хүрээн дэх албан ёсны хамтын ажиллагааны бодит эх суурийг тавих Харилцан ойлголцлын санамж бичигт талууд гарын үсэг зурлаа.
Төслийн хүрээнд М-Си-Эс Групп хийн түлшний үйлдвэрийг өөрийн зардлаар санхүүжүүлж Улаанбаатар хотод барьж байгуулан, 2011-2012 оны өвөл ашиглалтанд оруулах ба энэхүү үйлдвэр нь эхний шатанд 100,000 тонн нүүрсний хийн түлш үйлдвэрлэх хүчин чадалтай байх төдийгүй цаашдаа хүчин чадлын хэмжээг 200,000 тонн хүртэл өргөтгөх юм. Монгол Улсын Засгийн газар, холбогдох яамдын зүгээс уг төслийн хэрэгжилтийг бодлогоор дэмжиж, шаардлагатай хууль эрхзүйн орчныг бүрдүүлж, хамтран нэмэлт хөрөнгө оруулалт, санхүүжилт татах боломжийг судлах бол Улаанбаатар хотын Засаг даргын тамгын газрын зүгээс төслийг хэрэгжүүлэх бүсийн хүрээг нарийвчлан тогтоож, түгээлт болон хэрэгжилтийн бодит үе шатуудад дэмжлэг үзүүлэх төдийгүй иргэд, олон нийтэд төслийг тайлбарлан таниулах чиглэлд хамтран ажиллах болно.
Нүүрсний хийн түлш нь:
Хамгийн цэвэр түлш
Шаталтын үед утаа тортог огт гаргадаггүй, хүхрийн исэл ялгаруулдаггүй.
Гадаа пингээс хувингаар нүүрс оруулах, зуухандаа хийх, модоо асаах, утаа тавих, эцэст нь үнсээ цэвэрлэх, гаргаж асгах бүх зовлонгоос салж асаагуурын ганц товч эргүүлэх төдийд гэрээ дулаацуулж, хоолоо хийх бололцоотой болно.
Мөн хийн халаалтанд мод хэрэглэх шаардлагагүй тул ой модны баялгаа хамгаалан авч үлдэхэд чухал алхам болно.
Дэлхийн бусад оронд ахуйн хэрэглээний гол түлш нь хийн түлш байдаг. Бидэнд ч бас ийм байдлаар асуудлыг шийдвэрлэх боломж нээлттэй байна.
Европ, Америк, Японы стандартаар гэрийн нөхцөлд хэрэглэж болох хамгийн ирээдүйтэй түлш бол хийн түлш юм.
Нүүрсийг бүрэн орлоно:
Халаалтын болон ахуйн хэрэглээнд нүүрсийг бүрэн орлоно.
Хэрэглээний зардлыг жирийн иргэд, хэрэглэгчдэд дарамт үүсэхгүй байдлаар буюу нүүрстэй дүйцэхүйц хэмжээнд барих бодлого баримтлана.
Байгалийн хий болон нефтийн шингэрүүлсэн хийн арвин баялаг илрээгүй манай улсын хувьд хамгийн хямд төсөр, утаагүй түлшний шийдэл болно.
Нүүрсний арвин нөөц баялагтай Монгол оронд нүүрсийг гүн боловсруулан гаргасан бүтээгдэхүүн нь хэдэн зуун жилийн турш хямд түлшний найдвартай эх үүсвэр байх бүрэн боломжтой.