Шинжлэх ухааны акаде­мийн 2011 оны төсвийг дутуу олгосныг эсэргүүцэж ШУА-ийн   Үйлдвэрчний эвлэ­лийн хорооныхон  хэвлэлийн хурал зарлаж байв. Засгийн газрын 2010 оны 239 дугаар тогтоолоор төрийн албан хаагчийн цалинг 30 хувиар нэмсэн байхад  ШУА-ийн 2011 оны төсөвийг 298.8 сая төгрөгөөр дутуу бодсоныг эсэргүүцэж буйгаа дуулгасан юм. Дээрх 300 орчим сая төгрөг нь 71 хүний бүтэн жилийн цалинтай тэнцэнэ гэж тэд тайлбарлаж буй юм. Энэхүү мөнгийг нөхөн олгохыг шаардсан албан бичгийг ШУА-ийн Үйлдвэрчний эвлэлийн хороо­нынхон өнгөрөгч даваа гаригт БСШУ-ны сайдад хаяглан хүргүүлжээ. Тэд  шаардлагадаа баасан гариг хүртэл хариу өгөхгүй  бол БСШУЯ-ны гадаа жагсаал цуглаан зохион байгуулж, тэмцэхээ мэдэгджээ. Энэ хугацаа өнөөдрөөр дуусч байна. Тэдний шаардлагад ямар хариу өгөх, цалинг дутуу бодсон нь үндэслэлтэй эсэх асуудлаар БСШУЯ-ны Технологийн газрын дарга Б.Хүрэлбаатараас тодрууллаа.

 
-ШУА-ийн Үйлдвэрчний эвлэлийн хорооныхон ажилч­дын ца­лингийн 298 сая төг­рөгийг нөхөн олох шаардлага тавьсан. Шаар­длагын хариуг хэзээ өгөх вэ?
-Тэдний ирүүлсэн шаард­лагатай  танилцсан. 2011 оны төсөв дутуу  байна гэх шаардлагыг судлаад  үндэс­лэлгүй гэж үзсэн. Тиймээс  албан ёсны хариу өгөх гэж байна. Тэдний шаард­лагын хариуд сайд  гарын үсэг зурсан учир өнөөдөртөө ха­риуг нь өгнө. Нэг  зүйлийг онцолж хэлэхэд хэзээ ч 71 хүний цалин дутахгүй, ШУА-ийн эрдэмтэн судлаач, ажилчдын цалин хангалттай байгаа.
-Тэдний шаардлагыг үндэс­­лэлгүй гэж  үзэж буйгаа тайлбарлахгүй юу?
-Төрийн албан хаагчдын цалинг 30 хувь нэмэх журмаар нэмсэн. Үүнээс гадна цалин үргэлж хэлбэлзэж байдаг. ШУА 2010 оны цалингийн хэм­нэлттэй байгаа. 2011 онд ч хэмнэлт гарч болно. Түүнээс биш автоматаар нэмж хасаад, бодоод гаргадаг зүйл биш юм. Жишээ нь, ажилтнуудын зарим нь  гадаадад сурах, хүүхэд төрүүлэх, чөлөө авах гэх мэтээр цалин хэмнэгдэж байгаа. Нөгөөтэйгүүр хангалт­тай төсөв батлагдсан  гэх хариулт өглөө.

Харин ШУА-ийн таван салбарт 2011 онд хэдэн төгрөг төсөвлөгдсөн, Үйлдвэрчний эвлэлийн хорооны тавьсан шаардлага үндэслэлтэй эсэх асуудлаар  БСШУЯ-ны Санхүү, хөрөнгө оруулалт хариуцсан мэргэжилтэн   н.Мөнхгэрэлээс тодрууллаа.

-ШУА-ийн салбар нэг­жүү­дэд өнгөрсөн онд хэдэн төгрөг  төсөвлөж байсан бэ. Энэ жил хэдэн төгрөг болов?

-Өнгөрсөн онд улсын төсвөөс ШУА-ийн салбарт нийт 14.3 тэрбум төгрөг төсөвлөсөн. Үүнээс 7.3 тэрбум төгрөгийг зөвхөн  ажилчдын цалинд зарцуулна. Харин энэ онд төрийн албан хаагчийн цалин 30 хувиар нэмэгдэж нийтдээ 18.6 тэрбум төсөвлөснөөс 9.1 тэрбум төг­рөг цалинд зарцуулахаар тооцоолсон. Хүн бүрийн цалин 30 хувиар нэмэгдсэн гэсэн үг. Гэтэл дөнгөж он гарч байхад цалин хүрэлцэхгүй гэх асуудал тавьж  болохгүй л дээ. Хэрэв цалин  дутвал нөхөн олгох боломжтой.

-ШУА-ийн эрдэмтэн судлаачдын дундаж цалин 350 мянган төгрөг гэж байсан. Энэ үндэслэлтэй тоо мөн үү?

-Төрийн албан хаагчдын цалин нэмэгдсэнээс хойш дундаж цалин ч бас өссөн.  350 гэдэг бас л үндэслэлгүй тоо байна. Өөрөөр хэлбэл 9.1 тэрбум төгрөгийг 2040 ажилтанд хуваахаар нэг хүн жилд дунджаар 4.4 сая төгрөгийн цалин авна. Энэ 4.4 сая төгрөгийг 12 сард хуваахаар нэг ажилтны дундаж цалин 374 мянга болж байгаа юм.

-Яамнаас өгсөн шаард­лагын хариуг Үйлдвэрчний эвлэлийнхэн хүлээж авахгүй бол ямар арга хэмжээ авах вэ?

-Хэрэв ажилчдын цалин  дутах юм бол бид арга хэмжээ авна. Гэхдээ цалин дутахгүй гэдгийг хариуцлагатай хэл­мээр байна. Харин ШУА-ийн ажилчдын буруу зөрүү ойлголтыг засч залруулахын тулд салбар бүрийн нягтлантай уулзаж тулгалт хийж болно. Энэ асуудлыг бид ярилцаж байна гэв.

Харин ШУА-ийн Үйлд­вэрчний эвлэлийн хороонд  шаард­лагын хариуг албан ёсоор ирүүлээгүй байгаа аж. Үйлд­вэрчний эвлэлийн хорооны дарга Т.Баяр “Шаард­лагынхаа хариуг өөрсдөө албан ёсоор хүлээж авсны дараа тэмцлээ үргэлжлүүлэх эсэхээ шийднэ” гэлээ.