Цагаан сар болоход 14 хоног үлдээд байгаа. Нийслэлд худалдаалагдаж байгаа хүнсний аюулгүй эрүүл ахуй болон  чанарт Мэргэжлийн хяналтынхан болон холбогдох байгууллагууд шалгалт хийж  байна. “Шалгалтын явцад илэрсэн зөрчлийн 92 хувийг импортын бүтээгдэхүүн эзэлж байна”  гэж  НМХГ-ын эрүүл мэнд, боловсрол, соёлын хяналтын хэлтсийн дарга Д.Баярболд хэллээ. Тус шалгалтаар худалдааны төв, зах, бөөний төвд хуурамч, хугацаа дууссан, эрүүл ахуйн шаардлага хангаагүй хиам, будаа, үнэртэй гурил, хугацаа нь дууссан амтлагчууд, үйлдвэрлэсэн хугацаа нь тодорхойгүй школадны цуглуулга зэрэг бүтээгдэхүүн илэрчээ. Мөн хугацаа нь дууссан “супер амтлагч”, 0,75 граммын савлагаатай “Янта” кетчуп, шошгогүй хатаасан жимс, үзэм, чихрүүд байсныг илрүүлсэн байна.  НМХГ-ын байцаагчид шалгалтаар илэрсэн бүтээгдэхүүнийг устгалд оруулж, холбогдох арга хэмжээг газар дээр нь авч байгаа гэв. Энэхүү шалгалтын эцийн дүн энэ  сарын 28-нд гарах юм байна. Гэвч иргэдийн аюулгүй байдлын хангах үүднээс шалгалтыг цагаан сар хүртэл үргэлжлүүлэн хийх юм байна.

Аливаа улсын үндэсний аюул­гүй байдлыг илэрхийлэх гол зүйл нь хүнсний хэрэглээ. Манай улс хүнсний хэрэглээнийхээ 80 гаруй хувийг импортоор буюу  өмнөд хөршөөс авдаг гэсэн судалгаа бий. Үнэндээ бидний хэрэглэж буй гурил, махнаас бусад  нь өмнөд хөршийнх гэхэд хилсдэхгүй.  “Уг нь хоёр улсын гэрээнд импортын бүтээгдэхүүнийг тодорхой компа­ниудаас авч байхаар тусгасан. Гэтэл манай иргэд ченж болон хувь хүнээс бараа авч иргэдийн хэрэгцээнд нийлүүлдэг. Ченж, хувь хүмүүсээс авсан бүтээгдэхүүн нь хятад улсын хяналтад ордоггүй хуурамч сертификаттай бүтээгдэхүүн байдаг” гэж НМХГ-ын эрүүл ахуй, халдвар судлалын хяналтын улсын ахлах байцаагч Г.Цэндсүрэн хэлж байсан юм.  Мөн тэрээр хэлэхдээ сүүлийн жилүүдэд манай улсын хил, гаалийн хяналт сайжирсан. Ямар гэрээг үндэслэж бү­тээгдэхүүн оруулж ирж бай­на вэ гэдэгт та­вих  хяналт нь сайжирсан.  Гэх­дээ ганц нэг хууль бус үйлд­лүүд байхыг үгүйсгэхгүй гэв. 

Уг нь байнгын хянаж байх ёстой хүнсний аюулгүй байдал баярын үеэр ийнхүү идэв­хи­жээд бусад цагт сураггүй бол­дог нь бас л хачир­халтай. Хуу­ль, хяналтынхан ч бас л хүн. Тэд баярлахын тулд баярын өдрийг дөхүүлээд шалгах нь аргагүй шүү дээ гэх яриа ч нэгийг бодогдуулах шиг. Үр алга. Өмнө нь хуурамч, шаардлага хангахгүй бүтээгдэхүүн байсан. Одоо ч байна. Ирээдүйд ч байх нь бололтой. Бид ч баяраа тэмдэглэнэ. Баяр дагасан шалгалт ч эхэлнэ.

Шалгагчид маань үнэхээр аж­лаа хийж чадахгүй байна уу эсвэл хараагүй дүр үзүүлж халаасаа зузаатгаад байна уу гэдгийг бодох л зүйлийн нэг болоод байна.