Москва хотын өдрийг жил бүрийн есдүгээр сарын хоёр дахь долоо хоногийн Бямба гаригт тэмдэглэдэг. Энэ жилийн хувьд илүү онцгой тэмдэглэхээр зэхэж байна. Учир нь, энэ жил Москва хот 870 жилийн ойгоо тэмдэглэх юм.

Москвагийн өдөрт зориулсан урлагийн олон төрлийн арга хэмжээ Горькийн нэрэмжит цэцэрлэгт хүрээлэнд есдүгээр сарын 9-10-ны өдөр болно. “Содон хүмүүс” нэртэй энэ арга хэмжээний хүрээнд театрчилсан тоглолт, циркийн үзүүлбэр, хувцас загварын шоу багтжээ. Мөн Франц, Италийн театрынхан москвачуудыг баясгана.

Мэдээж ойн өдөр Улаан талбайд урлагийн одод оролцсон том концерт болно.  Энэхүү концертыг телевизээр орон даяар шууд дамжуулах юм.

Ойн арга хэмжээ есдүгээр сарын 9-ний өдрийн 13.00 цагт Москва хотын дуулал эгшиглэснээр эхэлж, орой 21.00 цагт ёслолын салютаар өндөрлөнө.

А.ТУЛГА

Эх сурвалж: РИА НОВОСТИ