Видео тоглоом үйлдвэрлэгч Nintendo компаний  3D зөөврийн тоглуулагч нь эрүүл мэндэд халтай тухай анхааруулга гарсны дараа тус компаний гүйцэтгэх захирал уг мэдээллийг хэтрүүлэгтэй мэдээлэл хийлээ хэмээн мэдэгджээ. Ирэх гуравдугаар сарын 27-нд АНУ-д худалдаанд гаргахаар төлөвлөж байсан 3DS-ийг хүүхдийн хараанд муугаар нөлөөлж болзошгүй тухай анхааруулж, зургаагаас доош насны хүүхдийг зөвхөн 2D хэлбэрээр тоглохыг зөвлөжээ.

Энэхүү анхааруулга Японд тус компаний вэбсайтанд нийтлэгдсэний дараа нийт хэвлэл мэдээллийн хэрэгсэл, блогуудаар цацагдаж, Nintendo-гийн гурван өдрийн борлуулалтыг хаажээ. Nintendo-ийн Америк дахь салбар хариуцсан ерөнхийлөгч Регги Филс-Эим Нью Йоркод болсон тоглоомын сурталчилгааны өдөрлөгийн үеэр “хэрэв 3D тоглуулагч хараанд сөрөг нөлөөтэй юм бол бусад ийм төрлийн төхөөрөмжүүд ч ижилхэн нөлөөтэй байх байсан” хэмээн хэлж олны дунд тархаад байсан айдсыг намжаасан байна.