Хичээлийн шинэ жилийн эхний өдөр Дорнод аймгийн Ерөнхий боловсролын сургуулийн сурагчид Ардын уран зохиолч, Төрийн гурван удаагийн шагналт, Академич Цэндийн Дамдинсүрэнгийн намтар, уран бүтээлтэй танилцлаа. Энэхүү танилцуулах өдөрлөг энэ жил анх удаа болж буй бөгөөд Дорнод нутгийн ирээдүй болсон хүүхэд багачууддаа Монгол хэл соёлоороо бахархах үзлийг төлөвшүүлэх зорилготой уг захирамжийг аймгийн Засаг дарга М.Бадамсүрэн энэ оны 05 дугаар сард гаргасан байна.

Өдөрлөг Ц.Дамдинсүрэнгийн нэрэмжит аймгийн Төв номын санд болжээ. Соёлын гавьяат зүтгэлтэн, утга зохиол судлаач, сэтгүүлч Л.Хэрээ их зохиолч Ц.Дамдинсүрэнгийн намтар, бүтээл, нэрэмжит номын сангийн өмнө сүндэрлэх их зохиолчийн хөшөө хэрхэн бүтсэн тухай сурагчдад танилцууллаа. Энэхүү арга хэмжээнд аймгийн Засаг дарга М.Бадамсүрэн, Засаг даргын орлогч Ш.Ёл болон холбогдох албаны хүмүүс, Хэрлэн сумын ерөнхий боловсролын 6 дугаар ангийн 28 бүлгийн 800 гаруй сурагч оролцлоо. Мөн үеэр их зохиолчийн хөшөөнд цэцэг өргөж, хүндэтгэл үзүүлсэн юм.

Дорнод нутгаас төрөн гарсан XX зууны манлай соён гэгээрүүлэгч, орчин цагийн Монгол хэлний дүрмийг үндэслэгч эрдэмтэн, орчуулагч, зохиолч Цэндийн Дамдинсүрэнгийн уран бүтээл нь яруу найраг, үргэлжилсэн үгийн зохиол, эрдэм шинжилгээний бүтээл, Монголын эртний зохиолын судалгаа шинжилгээ, орчуулгын зохиол гээд өргөн цар хүрээтэй. Цухас дурдвал: Монгол улсын Төрийн дуулалын үг, “Монголын нууц товчоо”-г орчин цагийн Монгол хэлнээ хөрвүүлсэн, С.Пушкины “Алтан загасны үлгэр” зохиолыг эх хэлнээ орчуулсан нь өдгөө ардын аман зохиол мэт нийтийн хүртээл боллоо гэж Дорнод аймгийн ЗДТГ-ын Олон нийттэй харилцах албанаас мэдээллээ.