Британийн Гадаад хэргийн төрийн нарийн бичгийн дарга Уилльям Хааг болон Батлан хамгаалахын төрийн нарийн бичгийн дарга Лаим Фокс нар нэгдүгээр сарын 20-нд Шинэ Зеландын Окланд хотноо хоёр улсын уулзалтанд оролцохоор хүрэлцэн ирлээ. Тэднийг Шинэ Зеландын Гадаад хэргийн сайд Муррэй МакКали, Батлан хамгаалахын сайд Вэин Маап, Батлан хамгаалах салбарын удирдагч Жерри Матепараи нар угтан авчээ.
 
Их Британийн төлөөлөгчид хуралд оролцохоосоо өмнө пүрэв гаригийн орой Окландын дайнд үрэгдэгсдийн дурсгалд цэцэг өргөх болно. Их Британийн Гадаад хэргийн төрийн нарийн бичгийн дарга Шинэ Зеланд улсад сүүлийн 18 жилийн хугацаанд анх удаа айлчилж байгаа нь энэхүү айлчлалын нэгэн онцлог болж байна. Энэ удаагийн айлчлалын үеэр талууд нийтлэг ашиг сонирхлын үүднээс улс төр, эдийн засаг, аюулгүй байдлын асуудлын талаар хэлэлцэх юм. Шинэ Зеланд болон Их Британи улс нь удаан хугацаанд, найрсаг, дотно харилцаатай байж ирсэн бөгөөд энэ удаагийн айлчлалд ялангуяа Шинэ Зеландын тал ихээхэн ач холбогдол үзүүлж байна.  

Б. Энхцэцэг