Унгарын нийслэл Будапешт хотноо жүдо бөхийн насанд хүрэгчдийн Дэлхийн аварга шалгаруулах тэмцээн дөрөв дэх өдрөө үргэлжилж байна.

Тэмцээний хуваарь ёсоор өнөөдөр эрэгтэйчүүдийн 81 кг, эмэгтэйчүүдийн 63 кг-ын жинд дэлхийн аваргын медальтнууд тодорно. Монголын баг тамирчдаас 81 кг-д ОУХМ О.Ууганбаатар, 63 кг-д ОУХМ Б.Мөнгөнчимэг, Б.Ганхайч нар өрсөлдөх юм.

О.Ууганбаатар 81 кг-ын жинд D хэсэгт сугалаа татжээ. Тэрбээр эхний тойрогт хийлж, хоёрдугаар тойрогт Хятадын тамирчин Гао Хайюань, Өмнөд Солонгосын жүдоч Ли Жэхюн нарын ялсантай нь барилдана.

63 кг-ын жинд Б.Ганхайч А хэсэгт эхний тойрогт Киргизстаны Мерим Момуноватай, Б.Мөнгөнчимэг D хэсэгт Энэтхэгийн тамирчин Сунибала Дели Хуидромтой учраа таарчээ.
Хэсгийн барилдаан 16.00 цагт эхэлнэ.

С.ЦЭЛМЭГ