Жүдо бөхийн Дэлхийн аварга шалгаруулах тэмцээний эрэгтэйчүүдийн 73 кг-ын жинд ОУХМ Г.Одбаяр хүрэл медалийн эзэн болж, ДАШТ-ээс анхныхаа медалийг хүртлээ.

Г.Одбаяр Будапештийн дэвжээнд эхний тойрогт хийлж, хоёрдугаар тойрогт Саудын Арабын бөх Мухаммед Алхарбиг цэвэр ялж, залгуулаад АНУ-ын жүдоч Александр Турнер, шилдэг жүдоч Дирк Ван Тичелт нарыг цэвэр ялсан боловч хэсгийн аваргын төлөөх барилдаанд БНСУ-ын тамирчинд ялагдал хүлээсэн юм.

Улмаар торгуулийн барилдаанд Хятадын ӨМӨЗО-ы тамирчин Сайнжаргалыг ялснаар хүрэл медалийн төлөө барилдахаар болсон. Ингээд медалийн төлөөх шийдвэрлэх барилдаанд Европын аварга, Азербайжаны жүдоч Хидаят Хейдаровыг нэмэлт цагт вазари үнэлгээгээр ялснаар медалийн тавцанд зогсох эрхтэй боллоо.

Монголын жүдочдоос Г.Одбаяр ДАШТ-ээс ес дэх хүрэл, нийтдээ 16 дахь медалийг эх орондоо авчирч байна.

С.ЦЭЛМЭГ