Эрдэм ном шамдан суралцахаар сургуулийн босго анхлан алхана гэдэг бага насны хүүхдийн хувьд том сорилт байдаг. Хүүхэд бүр харилцан адилгүй ч цоо шинэ газарт очиж, огт танихгүй хүнтэй уулзахаас тэд эмээж, тавгүйтдэг. Тэгвэл 6 настай балчирхан үрсээ “9 сарын 1”-ий чухал өдөрт хэрхэн бэлтгэх талаар товчхон зөвлөгөө хүргэе.

1 Өглөө хэдэн цагт сургууль дээрээ очиж, хэдэн цагт тарах, сургууль дээр байх хугацаанд ямар хичээл орж, юу хийдэг талаар хүүхдэдээ тайлбарлаж ойлгуулах

2 Сургуульд орж, сурагч болох тухайд ямар мэдрэмж, сэтгэгдэл төрж байгааг нь асуух. Баярлах, сандрах, айх, эмээх гээд бүгдийг нь хичээнгүйлэн сонсож, эргээд тайлбарлаж, залруулах

3 Есдүгээр сарын 1-ний өдрөөс өмнө хүүхдээ дагуулан сургууль дээр нь очиж, анги танхимтай нь танилцуулж, багштай нь уулзуулах

4 Сургуульд сурахын давуу талыг хүүхдэдээ тайлбарлаж ойлгуулах. Ганцаараа гэртээ уйтгарлаж суухгүй, олон найзтай болно, хэрэв хүүхэд чинь цэцэрлэгтээ унтах дургүй байсан бол сургууль дээр унтдаггүй гэх мэтээр ярьж, тайлбарлах

5 Хүүхэд бүр л түүний адил сургуулийн эхний өдрөөс айж, сандардаг гэдгийг хэлэх

6 Үзэгний сав, эсвэл дэвтрийнх нь завсар аав, ээж нь үргэлж хайрладаг гэдгийг илтгэх бяцхан зурвас, зураг хийж явуулах

7 Сургууль дээр ямар нэг асуудал гарахад аав, ээж нь үргэлж туслахад бэлэн гэдгийг ойлгуулах

8 Боломжтой бол сургууль эхлэхээс өмнө цаашид нэг ангид суралцах хүүхэдтэй нь танилцуулах. Ингэснээр таны хүүхэд хичээл эхлэх өдөр хэдийн найзтай болчихсон додигор алхах болно.

9 Сургууль руугаа явах замдаа хөрш айлынхаа үе тэнгийн хүүхдүүд, тэдний эцэг эхтэй хамт явах

Бэлтгэсэн С.ЦЭЛМЭГ
Эх сурвалж: АНУ-ын хүүхдийн эмч нарын академи