Дэлхийн аварга шалгаруулах тэмцээнийг зорьсон Монголын ширэн бээлийтнүүд өнөөдөр дэлхийн аваргын хүрэл медалийн төлөө тулалдана.

Германы Хамбург хотноо үргэлжилж буй ДАШТ-д Монголын баг дөрвөн тамирчны бүрэлдэхүүнтэй зорьсноос дөрвүүлээ медалийн төлөөх тулаанд шалгараад байгаа юм. 

ДАШТ-ий медалийн төлөөх эхний тоглолтууд өнөөдөр Монголын цагаар 21.00 цагаас, хоёрдугаар ээлжийн тоглолтууд 01.00 цагт эхлэх хуваарьтай.

Монголын тамирчдаас 49 кг-д Г.ГАН-ЭРДЭНЭ хүрэл медалийн төлөө Риогийн олимпийн мөнгөн медальт, Колумбийн боксчин Юберхен Мартинезтай, 64 кг-д Б.ЧИНЗОРИГ 2017 оны Европын аварга, Армяны боксчин Оганес Бачковтой тус тус тулалдана. 

Тэдний тулаан 21.00 цагт В рингэнд эхэлнэ.

Үдэш 01.00 цагт эхлэх хоёрдугаар ээлжийн тоглолтод Гавьяат тамирчин Д.Отгондалай, ОУХМ Б.Түвшинбат нар тоглоно. Д.Отгондалай 60 кг-д Венесуэлийн боксчин Луис Кабрератай, харин 69 кг-ын жинд Б.Түвшинбат Европын аварга, нутгийн тамирчин Абасс Бараоутай медалийн төлөө өрсөлдөх юм.

Боксчид хүрэл медалийн төлөөх тоглолтод ялалт байгуулбал дараа нь мөнгө, цаашлаад алтан медалийн төлөө тулалдах эрхтэй болно.

С.ЦЭЛМЭГ