Цэцэрлэг хүрэлцээгүйгээс хүүхдүүдээ бүртгүүлж чадахгүй хоцрох, бүртгүүлэхийн тулд олон хоногоор дугаарлан хонох гэхчилэн хүндрэл жил бүр тохиолддог. Тиймээс энэ жилээс эхлэн цэцэрлэгийн бүртгэлийг цахим хэлбэрт шилжүүлж байгаа. Анхны онлайн бүртгэлийн сугалаа өнөөдөр нийслэл даяар өрнөж, эцэг эхчүүд хүлээлтийн байдалтай байна.

Өглөөний 10.00 цагаас эхэлсэн сугалааны дүн эхнээсээ гарч эхэллээ. Зарим эцэг эхчүүдийн гар утсанд “Цэцэрлэгийн цахим элсэлтийн сонгон шалгаруулалтад таны хүүхэд сонгогдсон тул бүрт цэцэрлэг дээр ирж бүртгэлээ баталгаажуулна уу” гэсэн мэдээлэл ирсэн байна. Ийм мессеж авсан хүмүүс өнөөдөртөө багтан харъяа цэцэрлэг дээр очиж, бүртгэлээ баталгаажуулах учиртайг нийслэлийн Боловсролын газраас санууллаа. Ямар ч мессеж ирээгүй бол хүүхэд тань сонгогдоогүй гэсэн үг юм байна.

Цэцэрлэгийн цахим бүртгэлийн сонгон шалгаруулалт өнөөдөртөө багтаж дүнгээ гарган, цэцэрлэгүүд дээр бүртгэх ажээ.

Д.ЦЭЭНЭ