Бог малын мялзан өвчний улмаас дэлхийд ганцхан Монголд байдаг монгол бөхөн олон мянгаараа хорогдож эдүгээ дөрвөн мянга хүрэхгүй үлдээд байгаа билээ. Хэдийгээр байгаль хамгаалах байгууллагууд, төр засгийн хамтын ажиллагааны үр дүнд олон ажил хийж өвчлөлийг зогсоож чадсан ч дахин аюул ойртоод байна. Учир нь, энэ аюулт өвчнөөр янгир өвчлөх нь эрс нэмэгджээ. Бөхөн хамгаалах сүлжээ багийнхны ярьснаар өвчтэй янгир сүүлийн өдрүүдэд цөөнгүй үзэгдэх болсон аж. Тэд хэдхэн хоногийн өмнө Говь-Алтай аймгийн Тонхил сумын Сүмийн хөндийд өвчилсөн хоёр янгиртай тааралджээ. Нэг нь янзага байсан бөгөөд нүд нь нуухдаж, чацга алдсан, амьсгаадсан бол нас бие гүйцсэн янгир мөн адил шинжтэй байсан ажээ. Эдгээр нь  бог малын мялзан өвчний үндсэн шинж гэдгийг Дэлхийн байгаль хамгаалах сангийн мэргэжилтнүүд тайлбарлав. Байгаль хамгаалагчид өвчний талаар аймгийн мал эмнэлэг, байгаль орчны газруудад мэдээлсэн бөгөөд мэргэжилтнүүд газар дээр нь ирж өвчтэй янгираас цусны дээж авч Улсын мал эмнэлэг ариун цэврийн төв лабораторид шинжлүүлэхээр илгээжээ.

Янгир өвчилсөн тохиолдол Ховдын Дарви сумын нутагт ч гарчээ. Өөр олон газар янгир өвчилсөн байх магадлалтайг Дэлхийн байгаль хамгаалах сангийн Бөхөн хамгаалах сүлжээнийхэн тодотгов.  Янгир мялзангаар өвчилсөн тухай мэдээлэл малчдаас тэдэнд байнга ирэх болжээ. 

Янгирын сүрэгт энэ өвчин хурдацтай тархвал аргаль зэрэг амьтдад халдах төдийгүй Хар азаргын нуруугаар дамжин Баянхонгорын нутаг дахь амьтдад халдварлаж улмаар малыг өвчлүүлэх бодит аюул ойртох аж. Өнгөрсөн хаврын дэгдэлтийн үеэр бөхөн бүхий сумдын малыг вакцинжуулсан ч  ойролцоо аймгийн бүх малыг вакцинжуулж чадсан эсэх нь эргэлзээтэйг Дэлхийн байгаль хамгаалах сангаас мэдээллээ. Түүнчлэн төл малыг вакцинжуулсан эсэх нь ч тодорхойгүй бөгөөд энэ асуудлыг Онцгой байдал, холбогдох яам анхааралдаа авч урьдчилсан сэргийлэх тодорхой арга хэмжээ авах хэрэгтэйг тэд санууллаа. Хэрвээ цаг алдвал бог малын мялзан өвчин дэгдэж улсад олон тэрбумын хохирол учирч болзошгүй аж.

Д.УУДАМ