“Онги голынхон” хөдөлгөйөний тэргүүн, Монголын гол нууруудын холбоо болон “Гал үндэстэн” холбооны удирдах зөвлөлийн гишүүн Ц.Мөнхбаяртай ярилцлаа.
-Та бүхэн энэ жилийн цагаан сарыг “Төр түмэнтэйгээ золгох жил” болгон тэмдэглэхийг олон нийтэдуриалж байгаа юм байна. Монголын уламжлалт баяр цагаан сараа төрийн түшээдтэйгээ хамтдаа тэмдэглэх санаа чухам юунаас төрөн гарсан бэ? Урьд өмнө нь бид төр засгийн тэргүүнүүдийг есөн давхар хэвийн боов өрж, тарган ууц тавьсан ширээний ард суугааг нь зурагтаар хардаг болохоос хамтдаа шинэлж байсангүй. Та бүхний санаа биелэх болов уу?
-Монголын төлөө гэсэн зүрх сэтгэлтнүүдийг эгнээндээ нэгтгэсэн “Гал үндэстэн” холбоо байгуулагдаад тун удаагүй ч хүмүүс маш олноор биднийг дэмжиж байна. Сүүлийн хоёр гурван жил монгол түмний минь хувьд хатуухан он жилүүд байлаа. Эх орны маань өнцөг булан бүрд харийнхний нүд унаж, газар нутгийн бүрэн бүтэн байдалд аюул занал ирлээ. Ноднин жилийн цас зудын хар мөр одоо ч арилаагүй байна. Ийм нөхцөлд айл болгон тавгийн идээ, ууц шүүсээ бэлдэх гэж байдгаа барж байна шүү дээ. Тиймээс л хатуухан он жилүүдийг туулсан нь үнэн юм чинь заавал өөрсдийгөө хүндрүүлж, өрх гэртээ “хямарч” суулгүйгээр түмний төлөөлөл болсон төрийн түшээддээ золгоё гэсэн санаа төрсөн хэрэг. Тэд амьдралын боломж бололцооны хувьд биднээс хувь илүү. Тэгээд ч монголчууд сар шинийн өдрүүдэд урьд оныхоо алдаа оноог хэлэлцэн цайруулж, хар буруу санаагүйгээр шинэ ондоо ордог сайхан уламжлалтай. Тиймээс хадаг барьж очсон түмэн олонтойгоо хөөрөг зөрүүлэн, зөв буруугаа ярилцах байх гэж найдаж байгаа. Бид тэдний хийж буй үйл, хэлж буй үгийг нь дутуу ойлгоод ч байж болно шүү дээ.
-Төрийн түшээдийн хувьд хаана амьдардагийг нь нэгбүрчлэн мэдэхгүй юм. Хүмүүсийн дунд УИХ-ын гишүүд хот орчмын ногоон бүсэд орд харш бариулан тухалдаг гэж ярилцах юм билээ. Зарим нь хэд хэдэн газарт хаустай гэдэг. Харин төрийн гурван өндөрлөгийн хувьд харуул хамгаалалт, хашаа саравч болсон ордонд аж төрдгийг хэн хүнгүй мэднэ. Тэдэнтэй золгох сонирхолтой олон хүн бүртгүүлж байгаа гэлээ. Тэр олон хүнийг Их тэнгэрт нэвтрүүлнэ гэдэгт итгэлтэй байна уу?
-Харин яах нь вэ гэдгийг л үзмээр байна. Бид буу шийдэм агсаж, буруу санаа өвөрлөж очихгүй. Түмнээ төлөөлөн төр түшиж буй мяндагтнууд эгэл ард олноо хадаг бариад очиход нь хөөгөөд буцаахгүй байх гэж найдаж байна. Төрийн түшээд хаусанд аж төрдөг нь үнэн юм бол эгэл биднийг багтаачих хэмжээний орон зай олдох биз ээ. Үнэхээр бидэн шигээ давчуу, жаахан орон гэртэй байсан ч хуваагдаад ч болтугай ороод золгоно доо.
-Их сонин санаа дэвшүүлжээ. “Онги голынхон” хөдөлгөөн байгуулагдаад бараг арваад жил болжээ. Энэ хугацаанд зарим нэг хөдөлгөөнийхөн шантарч, няцаад тэмцлээ зогсоосон бол зарим нь аль хэдийн нам бараадсан байх юм. Та бүхнийг өнөөг хүртэл хурцлаад байгаа зүйл нь юу вэ?
-“Онги голынхон” хөдөлгөөнийг уул усны заяа тавилан нэгтэй хүмүүс анх байгуулж байсан юм. Гурван аймгийн найман сум дамжин урсдаг байсан Онги гол орвонгоороо эрэгсэн тул харамсаж халаглахдаа энэ хөдөлгөөнийг байгуулсан. Намайг хүүхэд байхад манайх сумын төвөөсөө 28 км-ын зайд нутагладаг байсан юм. Би гэдэг хүн өвлийн цагт тэшүүрэн унаатай. Голоо өгсөж гулгаад л гэртээ харина, уруудаж гулгаад сургуульдаа ирчихнэ. Зуны гурван сар Онгийн усанд шумбаж өссөн. Тэр ариун дагшин ус гол маань нүдэн дээр ширгэн үгүй болоход харамсахгүй байж чадаагүй. Бусад гол нуурын хөдөлгөөнийхөн ч яг ийм л байдлаас болж хөдөлгөөн байгуулсан байдаг. Бидний тэмцэл гол усаа ширгээхгүйн төлөө, ширгэснийг нь сэргээхийн төлөө эхэлсэн. Сүүл сүүлдээ энэ бол төр засгийнхны гаргасан шийдвэрээс бүх зүйл шалтгаална гэдэг нь харагдсан. Тиймээс “Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль”-ийг гаргахад санаачлагатай оролцсон. Хууль батлагдаад л бүх юм сайхан болно гэж бид итгэж байлаа. Гэтэл хууль нь батлагдсан ч хэрэгжүүлэхгүй жил гаруйн хугацаа өнгөрч байна. Хичнээн сайхан хууль батлаад ч биелүүлэхгүй бол уриа лоозонгоос хэтрэхгүй. Тэгэхээр зөвхөн төр засгийн бодлого нь бус төр бүхэлдээ өөрчлөгдөх ёстой гэдэг нь харагдаж байна. Тиймээс эх орон, гал голомтоо гэсэн найман бүлхэм нийлж “Гал үндэстэн” холбоог байгуулсан. Бид төр засгийг өөрчлөх хүртлээ тэмцэх болно.
-Тэмцлийн эхлэл нь өнгөрсөн намрын явдал байх нь ээ. Сэлэнгэ аймгийн Мандал суманд чухам юу болсон юм бэ. Заавал буудах хэрэгтэй байсан уу. Та бүхнийг мөрөө буруулан зугтаж явахдаа бичиг баримтаа гээсэн байсан гэсэн цуу тарсан. Өнөөг хүртэл тэнд чухам юу болсныг мэдэхгүй хүмүүс олон байна?
-Манай “Гал үндэстэн” холбоо хэд хэдэн шат дараатай арга хэмжээ авсан. Анх 2010 оын долдугаар сарын 2-ны өдөр найман зүйл бүхий шаардлагыг Ерөнхийлөгч, УИХ-ын дарга, Ерөнхий сайд нарт хүргүүлсэн. Улс үндэстний язгуур эрх ашиг хөндөгдөхөд хүрсэн тул урт нэртэй хуулийг нэн даруй хэрэгжүүлж эхлэхийг сануулсан шаардлагынхаа төгсгөлд хуулийг долдугаар сарын 16-ны дотор хэрэгжүүлэхгүй бол нийтээр босон тэмцэхэд бэлэн байна гэдгээ мэдэгдсэн. Гэтэл төр засгийн зүгээс ямар ч хариу өгөлгүй есдүгээр сарын 2-ныг хүргэсэн. Бид тэмцлийнхээ эхлэлийг Пураам, Сентарра гоулд компаниас эхэлсэн тэр өдөр бол 2010 оын есдүгээр сарын 2-ны өдөр байсан. Бид нууц далд хулгайн аргаар тэмцээгүй. Эхэлж компанийн удирдлагуудад, дараа нь ажилчдад нь мэдэгдэж байгаад буу тавьж, техникүүдийг нь зогсоосон. Энэ бол бидний эртнээс төлөвлөсөн “Оч хаях” ажиллагаа байсан юм. Бид оч хаях ажиллагааг эхлүүлэхээсээ гурван сарын өмнө буюу зургадугаар сарын 24-ний өдөр Сентарра гоулдын захирал Жон Казаковт байгаль орчинд учруулж буй сүйтгэлээ зогсоо, хүн, мал, амьтанд учруулсан хохирлоо барагдуул гэсэн шаардлагыг тавихад “Та бүхний тэмцэл үр дүнд хүрэхгүй. Тэр урт нэртэй хууль ч хэрэгжихгүй. Учир нь уул уурхайн компаниуд болон Уул уурхайн ассоциацитай хамтран танай төр засгийнхныг хэдийнэ лоббидсон” гэсэн тайлбарыг хэлсэн. Ж.Казаковын мэдэгдлийг бид баримтжуулж авсан.
-Яагаад Пураам, Сентарра гоулдыг сонгож “оч хаясан” хэрэг вэ?
-Сэлэнгэ аймгийн Мандал сумын нутаг Гачуурт, Буданчийн гол, Ноён уулын бэлд эдгээр компаниуд олборлолт хийж байгаа. Эл нутаг бол Монголын тулгар төрийг үүсгэн, улсынхаа гал голомтыг бадраасан ариун дагшин газар. Түүх сөхөн харвал эл нутаг нь Хүн гүрний голомт төдийгүй Хидан гүрний мандан бадарсан өлгий байдаг. Тиймээс л бид тэр нутгаас тэмцлээ эхэлсэн. Өнөөдөр Гачуурт, Буданчийн гол ширгэн үгүй болж, ард олон мал ахуй нь хүртэл ундны усгүйдсэний дээр Хонгорын хоёр дахь түүх тэнд давтагдаж байна. Дээрх нэр бүхий компаниудын байгаль орчинд учруулсан хохирол арав гаруй тэрбумаар тооцогдож байгаа. Тиймээс ч бид Улсын мөрлөн байцаах газарт эдгээр компанийг шалгуулахаар өргөдөл өгөөд байгаа. Ж.Казаков яллагдах нь гарцаагүй. Харин манай хуулийнхан тэднийг биш биднийг айлган сүрдүүлж байх зуур гэмт этгээд оргон зугтаж Паушокийн түүхийг давтах вий гэсэн болгоомжлол төрөх боллоо.
-Пураам, Сентарра гоулдынхан та бүхнийг бусдын эд зүйлд халдсан хэргээр гомдол гарган, эрүү үүсгээд байгаа. Энэ хэрэг ямар шантандаа яваа вэ?
-Уул уурхайн компаниудын хэргийг шийдээгүй хэр нь биднийг буруутгах гэж маш их хичээж байгаа нь нууц биш. Уг нь бидний хэрэг бол олон нийт болон төр нийгэмд аюултай үйл ажиллагааг таслан зогсоосон хэрэг шүү дээ. Эрүүгийн хуулинд энэ тухай тодорхой заалт бий. Гэтэл гүйцэтгэх байгууллагынхан тэр талаар судалж үзэхийг ч хүсэхгүй байна.
-“Гал үндэстэн” холбооноос Засгийн газар болон эрх баригч намуудыг шүүхэд өгөөд байгаа. Засгийн газрыг шүүх хурлыг нэг сараар хойшлуулсан нь ямар учиртай юм бол?
-Засгийн газрыг хууль хэрэгжүүлэхэд санаачлага гаргаагүй, эс үйлдэлд нь Шүүхэд хандсан байгаа. Шүүх хурал өнгөрсөн оны төгсгөлөөр болох байсан ч хариуцагч тал материалаа гүйцэд өгөөгүй гэх шалтгаанаар 30 хоногийн хугацаатай хойшлоод байгаа. Нэгдүгээр сарын 28-ны өдөр Сүхбаатар дүүрэгт болох Засгийн газрыг Шүүх хурлыг нээлттэй хийхийг бид санал болгосон. Одоогоор хаиу өгөөгүй байна. Харамсалтай нь уг хуралд Засгийн газрын тэргүүн ч, гишүүд ч оролцохгүй. Итгэмжлэгдсэн төлөөлөгч нь л ирэх юм билээ. Мөн эрх баригч хоёр намыг Дээд шүүхэд өгсөн. Улс үндэстнээсээ урвасан, ард олныг хагалан бутаргасан гэсэн үндэслэлээр АН,МАН хоёрыг татан буулгах өргөдлийг өгөөд байгаа.
-Төрийг өөрчилнө гэхээр төрийн эргэлт гэдэгтэй дүйж сонсогдоод байх юм. Та бүхэн хэрхэн яаж өөрчлөхөөр зорьж буй юм бэ. 2008 оны долдугаар сарын 1 шиг үймээн гарах вий гэж болгоомжлох сэтгэл төрж байна?
-Төрийн эргэлт ч гэх үү, юү гэж нэрлэхийг мэдэхгүй юм. Ямартай ч бүтэн өөрчлөлт хийх цаг болсон. Яг ингэж өөрчилнө гэж эртнээс хэлэмгүй байна. Мөн ирээдүйд ингэнэ, тэгнэ гэсэн амлалт ч өгөхгүй. Гэхдээ л өөрчлөхгүй бол мөхөлд ч хүрч мэдэхээр эгзэгтэй үед ирээд байна. Хэрэвзээ нэгдэж чадвал мандан бадрах зам байна. Эх орноо дэвжин дээшлүүлэхийн тулд айж, эмээж болохгүй. Айдас бол бидний их үйлд чөдөр болно. Би монголчуудынхаа саруул ухаанд найддаг. Бидний тэмцлийн үнэн мөнийг ойлгосон хүмүүс олноороо нэгдэж байгаа. Монголчууд маань гадаад дотоодын харь санаатнуудын булхайг төдийлөн таниагүйгээс будилж буруутаж явна. Тиймээс бид “Гал үндэстний дуудлага” зохион байгуулж байгаа. Баруун дөрвөн аймаг, Налайхад очиж, хүмүүсийн санаа бодлыг сонслоо. Монголчуудынхаа сэтгэлийн галыг бадрааж, нэгэн зүгт чиглүүлж чадвал төрд өөрчлөлт хийх нь алга урвуулахын дайтай зүйл л дээ. Өөрчлөлт гэдгийг би зөвхөн өнгө будгийн төдий хэлэгүй юм шүү. Улс орон маань харийнхны шунахай бодлого, тэдний гар хөл болсон улстөрчдийн балгаар хэдийнэ хэвтэрт орчихоод байна. Тиймээс эгэл жирийн иргэд бид нэгдэж мандан бадраах цаг ирсэн. Эс тэгвээс мөхөл ойрхон байна.
-Гадныхны гар хөл болсон улстөрчид гэхээр эрх баригчид санаанд орж байна л даа. Төр, засгийн эрх баригчдын өөдөөс тэмцэх нь муурын сахлаар тоглох хулганы үлгэртэй адил шүү дээ. Тиймээс ч тэмцэхээр гарч ирсэн олон хүмүүс зориг мохон буцдаг. Зарим нэг хөдөлгөөний тэргүүнүүд нь нам хүчин бараадан, албан тушаалын шагнал хүртээд таг болдог шүү дээ. Таныг тэднээс ялгаатай гэдэгт итгэлтэй байж болох уу?
-Энэ тухай надаас олон сэтгүүлч асуусан. Би ч олонтаа хариулсан боловч хүмүүст хүрэхгүй юм. Анх Онги гол хөдөлгөөнийг байгуулсан түүхээсээ дээр цухасхан дурдсан. Онги гол бохирдож, нутаг орныхон маань өвдөж шаналж, идэрмэгхэн хүмүүс хүртэл хорвоог орхиж байлаа. Тэр аюулыг манай гэрийнхэн ч биеэрээ амссан. Хүүхдүүд шар өвчин тусч, ээж маань насан эцэслэсэн. Тийм гашуун зовлонг умартан, урваж хөрвөх сэтгэл надад төрдөггүй. Тэгэх ч эрхгүй. Иргэний хөдөлгөөн нэрээр гарч ирээд няцаж, буцсан хүмүүсийг буруутгах нь хаашаа юм. Ямартай ч иргэний зориг гарган тэмцэлд уриалсан нь сайн хэрэг. Харин цаг хугацааны шалгуурт унасан нь харамсалтай. Байгаль орчноо хамгаалахаар зориг шулуудсан биднийг улс төр, эдийн засгийн ашиг сонирхолд автсан гэж хэлэх хүн харин үгүй байх аа.
-Танай холбооныхон байсгээд л хэвлэлийнхэнд ханддаг. Мөн хөдөө орон нутгаар их явах юм. Ингэлээ гээд хүмүүст нөлөөлж чаддаг уу. Хөдөө орон нутгаар явж хүмүүстэй уулзах, хэвлэлийн хурал хийхэд ч хөрөнгө мөнгө орох нь мэдээж. Тэр бүгдийг хэрхэн зохицуулж байна вэ?
-Ихэнх тохиолдолд олны дэмээр явж ирсэн. Болохгүйдээ хүрвэл хормой хотоо тэмтэрнэ шүү дээ. Хүмүүс байр орон сууцаа томруулахыг илүүд үздэг бол би багасгаж сольдог болсон. Ер нь бол биднийг ойлгож дэмждэг олон хүн бий. Монголын хэвлэлийн хүрээлэн л гэхэд мэдээлэл хийхэд хоёр ч удаа үнэ хөлсийг нь чөлөөлж байсан. Энэ мэт сайн санаат хүмүүсийн буянаар явж ирсэн.
-Яг үнэнийг хэлэхэд амьдралаа хоёрдугаарт тавих хүн төдий л олонгүй шүү. Таны гэр бүлийнхэн дургүйлхдэггүй юү?
-Үгүй дээ. Одоо дассан. Хүмүүс ийм муухай бусармаг зүйл хийж байгааг харсаар байгаад зүгээр сууна гэдэг өөрөө том нүгэл. Гомдох, залхах, шантрах эрх байхгүй.
-Ажиглаад байхад монгол эрчүүд илүү нутгархаг байдаг шиг санагддаг. Тэр дундаа ахмад настнууд маань уул усандаа ойр байсан болохоор та бүхнийг ойлгож, дэмжих нь олонтаа юм уу даа?
-Эрчүүд ч гэхгүй нутаг орныхоо төлөө эмэгтэйчүүд ч тэмцэж байна. Харин ч хүүхнүүд илүү дайчин байдаг юм билээ. Хэд хэдэн жишээ үүнийг баталсан. Заамарт болсон тэмцэлд жирэмсэн бүсгүй хүртэл оролцож байсан. Харамсалтай нь хамгаалалтынхан түүнийг өшиглөснөөс үр нь зулбасан. Манай холбооны гишүүдийн хувьд залуучууд цөөнгүй хувийг эзэлдэг.
-Хамгаалалт гэснээс төр, засгийнхан та нараас илүү хамгаалалттай, бас мөнгөтэй шүү дээ. Тэгээд ч тэр хамгаалалтад гарч байгаа цэрэг цагдаа нар чинь бас л монгол хүмүүс. Тэгэхээр дээдсүүд далдхан нуугдаж, эгэл борчууд л хоорондоо тэмцэлдээд байдаг хэрэг биш үү?
-Тийм ээ, цэрэг цагдаагийнхан ч монгол хүмүүс. Тэдэнд ч төрж, өссөн дов толгод, уул ус бий. Мөрдэсэнд амаа таглуулсан л болохоос биднийг дэмждэг хүмүүс тэдний дотор олон байгаа. Тиймээс хүчний байгууллагынхан бидний өөдөөс тэмцэхгүй. 2008 оны долдугаар сарын 1-ний үйл явдал их сургамж болсон. Тиймээс эгэл ардынхаа өөдөөс гал нээх бодол хүчнийхэнд дахин төрөхгүй гэдэгт итгэж байгаа. Гэхдээ аль болох буу шийдэмд тулахгүйгээр өөрчлөлт хийхийг хичээж байна.
-Урт нэртэй хуулийг хэрэгжүүлэх эхлэл тавигдсан. Хуульд заасан бүсэд мянга гаруй аж ахуйн нэгж хамрагдаж, тэдэнд 7,1 их наяд төгрөгийн нөхөн төлбөр төлөхөөр яригдаж байна. Энэ их мөнгө Монголын төрд байхгүй, өгсөн ч татвар төлөгчдийн халааснаас л гарна шүү дээ?
-УИХ, Засгийн газрынхан ийм л халхавч үг хэлж, хуулийг хэрэгжүүлэхгүй байна. Учир нь уул уурхайн салбараас халаасаа зузаатгадаг гишүүд цөөнгүй. Засгийн газрынхан бол тэр чигтээ эсрэг үзэлтнүүд болсон. Ерөнхийлөгч ч цэвэрхэн хүн биш. Ингээд бодохоор итгэх хүн алга. Уг нь Монголын төр уул уурхайн компаниудад мөнгө төлөх биш, нэхэх эрхтэй. Учир нь эх орны өнцөг булан бүрт байгалийн унаган төрх алдагдсан. Түүнийг мөнгөөр хэмжвэл компаниудын нэхэмжлээд байгаа мөнгөнөөс давсан тоо гарна.
-Компаниудыг хөөн гаргахад тэдний орон зайг улсад нэг ч төгрөгийн татвар төлдөггүй нинжа нар эзэлчих магадлалтай гэх юм?
-Нинжа нараас газраа хамгаалах арга бий. Тэдгээр газрыг Улсын онц чухал объектийн жагсаалтад авч, цэрэг цагдаагаар хамгаалуулчихвал нинжа нар нэвтрэхгүй. Урьд нь Ц.Элбэгдорж Заамарын хөндийг тийн хамгаалж байсан. Харамсалтай нь өөрсдийнхнөөсөө хамгаалаад Паушокт л алдчихсан болохоос.
Биднийг ийн ярилцаж байхад ахмад хуульч С.Жавзмаа гуай хүрэлцэн ирсэн юм. Тэрбээр өөрийн санал бодлоо илэрхийлэхдээ “Би өнгөрсөн жил 10 гаруй аймгаар явж, бодит байдлыг газар дээр нь үзлээ. Үнэхээр нүд халтирмаар болжээ. Урт нэртэй хуулийг хэрэгжүүлэхэд гарч буй нөхөн төлбөрийн хэмжээг төтвөр төлөгчдөөс авах бус тухайн уул уурхайн компаниудад тусгай зөвшөөрөл, лицензийг нь олгосон хүмүүсээс л гаргуулах учиртай. Монгол Улсын Үндсэн хуульд “Монгол хүн аюулгүй орчинд амьдрах ёстой” гэж заасан. Үүнийг л хамгийн түрүүнд баримтлах учиртай. Бид энэ талаар УИХ-ын даргад хандсан боловч өнөөг хүртэл хариу өгсөнгүй” хэмээн өгүүлж байлаа.
Д.Цээпилмаа