ОХУ-ын Ерөнхийлөгч Путины санаачилгаар зохион байгуулагддаг ‘Олон улсын цэргийн тоглолт-2017’ үргэлжилж байна. Тоглолтын хүрээнд Казахстан Улсын Жамбул мужийн ‘Гвардейский’ цэргийн баазын сургалтын төвд ‘Мэргэн буудагчийн зааг’ тэмцээн өчигдөр эхэлсэн юм.

Тэмцээнд Азербайжан, Армен, Бангладеш, Беларусь, Венесуэл, Грек, Зимбабве, Энэтхэг, Иран, Казахстан, Хятад, Киргиз, Монгол, ОХУ, Тайланд, Узбек, ӨАБНУ зэрэг 17 орны 160 гаруй мэргэн буудагчид цэц мэргэн, авхаалж самбаа, цэргийн хэргийн мэдлэгээ сорьж байна.

Тэмцээний зорилго нь улс хоорондын олон улсын цэргийн хамтын ажиллагааг бэхжүүлэх, шилдэг мэргэн буудагч, мэргэн буудагчийн хослол, багийг тодруулах, мэргэн буудагчдын тэргүүн туршлага, бэлтгэлийн арга барилыг дэлгэрүүлж, цэргийн хэрэгт нэвтрүүлэх зэрэгт оршдог.

Тэмцээн нэг бүрийн сорил, хослолын сорил, мэргэн буудагчийн буухиа гэсэн гурван үе шаттай явагдах бөгөөд тамирчид мэргэн буудагчийн винтов СВД буу, өдрийн болон шөнийн хараа, гар буу ПМ, сургуулийн дуу чимээний РГД гар гранат ашиглах аж.

Монгол Улсын Зэвсэгт хүчнийг төлөөлөн найман хүний бүрэлдэхүүнтэй үндсэн баг, багийн ахлагчаар ЗХЖШ-ын цэргийн зэвсэглэлийн хэлтсийн дарга, хурандаа Б.Хадбаатар, дасгалжуулагчаар Зэвсэгт хүчний 123 дугаар ангийн захирагч хурандаа С.Түвшинбаяр, шүүгчээр Монгол Улсын гавьяат дасгалжуулагч дэд хурандаа Л.Ундралбат нар оролцож байна.

Өнгөрсөн жил монголын баг тамирчид анх удаа оролцож багийн дүнгээр тавдугаар байр, мэргэн буудагчийн хослолын төрөлд ахмад Н.Мөнхбаатар /119/, ахлах ахлагч Н.Баясгалан /016/ нар гуравдугаар байр эзэлсэн амжилт үзүүлсэн юм.

‘Мэргэн буудагчийн зааг-2017’ тэмцээн энэ сарын 9-нд өндөрлөнө.

Г.ХОРОЛ