‘Токио 2020’ олимпийн наадмын хөтөлбөрт шинээр нэмэгдээд байгаа сагсан бөмбөгийн 3х3 төрлийн энэ оны хоёр дахь “Их дуулга” тэмцээн /FIBA 3×3 World Tour/ өнгөрөгч амралтын өдрүүдэд /2017.07.29-30/ Японы Уцуномия хотноо боллоо. Тус тэмцээнд дэлхийн шилдэг найман баг оролцсоноос манай улсаас дасгалжуулагч С.Тулгын удирдлага дор Д.Дэлгэрням, Э.Дөлгөөн, Э.Цэрэнбаатар, Г.Цэнгүүнбаяр нараас бүрдсэн “Ulaanbaatar Garuda” баг өрсөлдсөн юм.

Манай залуус ¼ тоглолтод Сербийн алдарт Novi Sad Al Wahda багт 18:11 онооны харьцаагаар хожигдлоо. Дэлхийн гурван удаагийн аварга, Европын аваргын алтан медальт энэхүү баг мэргэжлийн тэмцээнд Арабын нэгдсэн Эмират улсын нэрийн өмнөөс тоглодог байна.

Манай сагсчид эхний тоглолтод дэлхийн чансааны тэргүүлэгч баг Словенийн Лжублжанаг 14:11 онооны харьцаагаар ялсан бол удаах тоглолтод талбайн эзэн Окояамагийн багт 19:18-аар ялагдсан. Ийнхүү манай баг хэсгээсээ хоёрдугаар байраар шалгарч Сербийн алдарт Novi Sad Al Wahda багт дийлдсэн юм.

Словенийн Лжублжана баг долдугаар сард Канадын Саскатун хотод болсон ‘FIBA 3×3’ тэмцээнд түрүүлсэн баг аж. Мөн японы багт гурван легионер тоглогч багтжээ. FIBA 3×3 World Tour тэмцээн нь мэргэжлийн тэмцээн учир гадны легионер тоглогчдыг багтаа элсүүлж болдог дүрэмтэй аж.

Манай сагсчид 3х3 төрлийн тэмцээнд оролцоод гурван сар болж байгаа бол “Их дуулга”-д оролцож байгаа багууд 13-15 тэмцээнд оролцсон туршлагатай багууд аж.

3х3 төрлийн энэ оны хоёр дахь “Их дуулга” тэмцээнд “UB Garuda” 8-д эрэмбэлэгдэн тоглосон бөгөөд дэлхийн 3 удаагийн аварга, өнгөрсөн жилийн “Их дуулга”-ын аварга Сербийн алдарт Novi Sad, Словений алдарт Ljubljana, Piran, Сербийн Zemun, Liman, Польшийн Krakow, ОХУ St Peterburg, Австралийн Auckland, Тайваны Hsinchu багууд өрсөлдлөө. Энэхүү “Их дуулга”-ын шагналын сан 30 мянган ам.доллар бөгөөд түрүүлсэн баг ирэх аравдугаар сард БНХАУ-ын Бээжин хотноо болох World Tour Final өрсөлдөх эрхийг авсан юм.

Дэлгэрэнгүй мэдээллийг эргэн хүргэнэ.

Тоглолтын бичлэгийг ЭНД-с үзнэ үү.

Ч.БОЛОР