Иргэдийн шударга шүүх ТББ-ын Удирдах зөвлөлийн дарга Х.Бат-Ялалт, тэргүүн н.Батбаатар, гүйцэтгэх захирал  Б.Мөнх-Алдар нарын хүмүүс өнөөдөр сэтгүүлчдэд мэдээлэл хийлээ. Удирдах зөвлөлийн дарга   Х.Бат-Ялалт нам байгуулахгүй, улс төрийн үйл ажиллагаа явуулахгүй гэдгээ мэдэгдэж, сонгууль ойртож буйтай холбогдуулан ард иргэддээ уриалга гаргаж, Засгийн газарт санал хүргүүлэх тухай онцлон ярьсан юм. Тодруулбал, төрийн албан хаагч иргэдийн өргөдөл гомдлыг шийдвэрлэж буй байдалд хяналт тавих, төрийн албаны дотоод хяналтыг ТББ-д хариуцуулах хэрэгтэй гэж  үзэж байгаа аж.  Мөн  ард иргэддээ хандан мэдлэгтэй, зоригтой, тууштай, итгэлтэй, ухаалаг  байхыг сануулсан уриалга гаргаснаа дуулгасан юм. Тэдний хэлснээр “Төрийн албаны бүх шатанд авлига өгөх юмуу танил талаараа орж байгаа нь хариуцлагын тогтолцоог үгүй хийж байна. Төрийн албан хаагчдын дутагдал, зөрчлийг хэлэхээр хөлөө “хүрэх газраа явж заргалдаарай” гэх утгатай юм яриад сууж байдаг. Энэ нь цаанаа ямар нэгэн татаас түлхээс байгааг л харуулж буй хэрэг” гэж байв. Энэ үеэр Иргэдийн шударга шүүх ТББ-ын Удирдах зөвлөлийн дарга   Х.Бат-Ялалтаас цөөн асуултад хариулт авлаа.

-Иргэдийн шударга шүүх ТББ байгуулагдсан цагаасаа хойш иргэдийн төлөө хэрхэн ажиллав. Та бүхнийг гэнэт гарч ирж хэвлэлийн  хурал зарлаад л алга болчихдог гэж ярих  хүн цөөнгүй бий?

-Бид 2006 оноос хойш шударга шүүхийн төлөө багагүй ажил амжуулж, нэг зүйлийн төлөө тууштай тэмцэж байгаа. Өнөөдөр ард иргэд, төр засагт хандан уриалга гаргаж байггаа маань гэнэт л хийж буй зүйл биш. Байгуулагдсан цагаасаа хойш давж заалдах болон дээд шүүх дээр ирсэн 300 гаруй хэрэг маргааныг шударга шийдвэрлүүлэхэд оролцсон байна. Мөн хилс хэргээр ял эдэлж байсан зургаан залууг суллаж, хилсээр эрүүдэн шүүгдэж байсан 20 гаруй хүнийг хэргийг үнэн зөв шийдвэрлэсэн. Мөн бидэнд иргэдээс 10 мянга гаруй хууль тогтоомж зөрчсөн, авлига авсан тухай  нотлох баримт цуглуулсан байна лээ. Бидний тэмцэл үргэлжилсээр байгаа. 2011 онд  бид улам  идэвхитэй тэмцлээ үргэлжлүүлэхээр төлөвлөсөн.

-Таныг төрийн байгууллагаар иргэдийн өмнөөс явж байхад хүнд суртал гаргах байдал хэр ажиглагдаж байна?

-Хүмүүс намайг бусдын төлөө яваад байна гэж ойлгодог байх. Харин би өөрийнхөө төлөө явж байгаа юм. Учир нь би Монгол Улсын иргэн хүн. Өөрт тохиолдсон асуудлаа   хуулийн дагуу шийдвэрлүүлэх,  чирэгдэлгүй, хүнд сурталгүй байхыг хүсдэг. Бүх хүн үүнийг хүсдэг байх. Шүүх хурал дээр “Чи дуугуй бай” гэдэг байсан бол өнөөдөр би үгээ чөлөөтэй хэлэх хэмжээний болсон. Түүнээс биш ямар нэг ашиг сонирхлын төлөө ингээд яваад байгаа хэрэг биш юм.

С.Отгон